ЕУ нема капацитети да го замени Старлинк во краток рок

Европската Унија нема капацитети да го замени „Старлинк“ (Starlink) во соодветен рок, призна денеска високата претставничка на ЕУ за надворешни работи и безбедносна политика, Каја Калас, цитирана од западните агенции.

Таа изјавата ја даде откако Украина се пожали на ограничувањата на сателитската мрежа на Елон Маск, која има клучна улога за украинските вооружени сили.

„Старлинк“ е навистина неопходен за Украина и, за жал, Европа не може да го замени на краток рок, рече Калас на самитот на Европскиот совет во Брисел. 

„Затоа денеска разговараме и за нашата одбранбена подготвеност“, за да се обидеме да го компензираме она што го немаме во ЕУ, додаде таа.

Киев се жалеше во последните денови дека не бил предупреден од своите сојузници за претстојните руски напади по доцнењата во сателитските услуги што ги обезбедува „СпејсИкс“, компанијата во сопственост на милијардерот Илон Маск, кој е исто така близок сојузник на американскиот претседател Доналд Трамп.

Соѕвездието сателити на „СпејсИкс“ го вклучува „Старшилд“, систем од воено ниво што го користи Украина за комуникации на линијата на фронтот и одбранбените операции, и „Старлинк“, кој е за цивилна употреба.

Елон Маск рече дека сите доцнења на воената мрежа „Старшилд“ во Украина се должат на американската влада, а не на неговата компанија.

„Старшилд“ повторно беше во функција следниот ден, изјави претставник на украинското Министерство за одбрана.

На денешниот самит, холандскиот премиер Роб Јетен ја нагласи потребата од редовни контакти меѓу Европејците и Американците „за важноста на добрата поврзаност во Украина.“

„За среќа, сега е обновено. Можеме да видиме дека Украинците веднаш имаа корист од тоа. Вчера разговарав и со францускиот претседател како ние, како Европејци, можеме да обезбедиме повеќе услуги од ваков вид“, рече Јетен.

„Ќе ни биде потребно извесно време за да ги развиеме истите можности“ како Американците, призна летонскиот премиер Андрис Кулбергс.

„Имаме одреден капацитет во овој поглед, но недоволен. Затоа ова е стратешко прашање за кое треба да разговараме денеска“, додаде тој пред средбата со своите европски колеги.

ЕУ има сателитска мрежа управувана од француската компанија „Еутелсат“, но таа е многу помала од „Старлинк“.