ЕУ ќе им го отежни издавањето визи на Русите

Министрите за надворешни работи на земјите-членки на ЕУ ќе ја поддржат идејата за укинување на поедноставената процедура за издавање шенген визи за руските граѓани, пишува „Фајненшел тајмс“.

Како што изјавија за весникот тројца функционери вклучени во преговорите на оваа тема, ова официјално ќе биде соопштено на дводневната средба на министрите за надворешни работи, што ќе започне во Прага на 30 август. Претходно беше соопштено дека таков предлог ќе биде даден од чешкиот министер за надворешни работи Јан Липавски.

Договорот за олеснување на визниот режим беше склучен меѓу Русија и ЕУ во 2007 година. Неговиот прекин ќе значи дека Русите кои се обидуваат да добијат шенген виза ќе мора да достават повеќе документи. Конзуларната такса за издавање виза ќе се зголеми од 35 на 80 евра, а барањата ќе се разгледуваат подолго.

„Ние сме во исклучителна ситуација и таа бара исклучителни мерки. Сакаме да одиме подалеку од откажување од визното олеснување“, изјави неименуван европски функционер за ФТ. Според него, посериозни ограничувања може да се донесат пред крајот на годината.

По руската инвазија на Украина, многу земји од ЕУ го запреа или ограничија издавањето визи за Русите. Европската унија ја укина и поедноставената процедура за издавање визи за руските дипломати и бизнисмени.

Во летото, земјите од Европската унија кои граничат со Русија почнаа да зборуваат за потребата да се ограничи, па дури и да престане да издава туристички визи за Русите. Естонија, особено, го ограничи влезот на Русите со шенген визи издадени од Естонија.