Ескобар: Не сум тука да вршам тортура
На секој чекор од нашите предизвици сметавме на вас и сакаме вие да сметате на нас во своите предизвици, рече Ескобар обраќајќи ни се како НАТО сојузник
Заменикот помошник државен секретар на САД, Габриел Ескобар, ги негираше обвинувањата на лидерот на ВМРО-ДПМНЕ, Христијан Мицкоски, дека странски преставници доаѓаат во земјата на барање на нашата влада за да му вршат тортура и притисок за да ги прифати уставните измени што се во процедура. На неговото недипломатско добредојде Ескобар одговори дипломатски и со убави зборови за нашата земја.
-Нема никого да подложувам на тортура. САД не ги избираат владите во земјите кои се нејзини сојузници во НАТО, но поставуваме очекувања. Единствената работа што сакам да ја направам е да ја дадам истата порака што ја ширам во регионот, дека САД ги гледаат како природни партнери земјите кои се посветени на европска интеграција, на НАТО и на борбата со корупцијата. Сакам тоа јасно да го посочам, но и да слушам и да имам отворена размена на мислења, рече Ескобар на прес конференцијата пред средбата со лидерот на опозицијата.
На прашањето дали очекува да бидат донесени уставните измени Ескобар рече:
„На Соединетите Американски Држави им е мило што тој процес започна и се надевам дека ќе продолжи“.
Тој неколкупати повтори дека САД се пријател и сојузник со Северна Македонија, дека нашата држава многупати им помогнала и дека сакаат тие да ни помогнат нам околу нашите предизвици.
„Ги почитувам луѓето во оваа земја и таа се покажа како вистински пријател и партнер на САД. Северна Македонија последните неколку години ни помогна за Авганистан, за Украина, како претседавач на ОБСЕ, а во последно време и за постигнување на историскиот договорот меѓу Косово и Србија за нормализација на односите. Тоа не можевме да го сториме без вас. На секој чекор од нашите предизвици сметавме на вас и сакаме вие да сметате на нас во своите предизвици. Како резултат на партнерството што го имаме со Европа, сакаме да ве видиме во ЕУ и ние сме вашите најентузијастички поддржувачи. Секогаш сум велел дека Западниот Балкан е најнадежниот дел од Европа со најголем економски раст во моментов. Европа и Америка имаат потреба од вас. Сакаме и вие да имате корист од тоа стратешко партнерство во носењето на тешките одлуки за вас“, рече Ескобар.
Премиерот Димитар Ковачевски пак се фокусираше на уставните измени порачувајќи дека и натаму е убеден дека во овој процес ќе излеземе победници и дека Македонија ќе биде следната земја членка на ЕУ. На забелешката уште колку странски делегации треба да дојдат за да пројдат уставните измени тој рече дека за прашањето се дебатира толку долго бидејќи е важно и стератешко.
„Фактот дека водиме дебата подолго време, значи дека се работи за исклучително стратешко прашање кое ја решава иднината на многу генерации. И ќе се води толку колку што е потребно за да се донесе правилна и вистинска одлука со која ќе се остварат визијата и целите на граѓаните тука. Доколку се работи за одлука која што не дефинира иднина, тогаш веројатно и дебатата не би се водела ниту толку долго, ниту толку детално. Процесот ќе се води, ќе се дебатира и ќе заврши успешно за граѓаните и за државата“, порача Ковачевски.
Прашан дали е оптимист дека може да се изнајде договор Северна Македонија да добие преговарачка рамка со која што ќе ги отпочне преговорите, Ковачевски рече дека е рационален оптимист.
„Тоа значи дека верувам во остварување на целта и работам таа цел да се оствари. Пораката која што повторно ќе ја упатам до пратениците во Собранието, е дека тие се претставници на граѓаните. Граѓаните многу јасно кажуваат дека сакаат да бидат дел од ЕУ. Пратениците треба да бидат дел од европската идеја за Северна Македонија. Тие ја зеле одговорноста и честа да ги застапуваат граѓаните во Собранието и утре ќе бидат запишани во историјата како личности кои обезбедиле европска иднина на државата. Јас сум горд на сите пратеници во нашето Собрание, кои биле дел од носењето на важните стратешки и тешки одлуки за државата“, рече Ковачевски.
Тој ги повтори познатите ставови дека нови барања од Бугарија според Преговарачката рамка и дека тоа го потврдиле на оваа средба со Ескобар, но исто така дека не може да има и нов договор и репреговарање на Преговарачката рамка, поради што како што посочи опозицијата ја напуштила реториката на таа тема. Изгласувањето на уставните измени, рече тој, САД го сметаат за клучен чекор во овозможувањето на европската иднина на Македонија, што е пак став кој кореспондира со тој на владеачката коалиција и на 80 отсто од граѓаните во земјата.
На почетокот пак на прес конференцијата се осврна на недипломатското добредојде од Мицкоски за високиот гостин.
„Сакам да одговорам на едно прашање кое беше отворено во текот на изминатите два дена од страна на опозицијата и, ќе го цитирам, беше кажано дека Владата коленичи за да дојдат странски дипломати за да вршеле притисок како дел од светски заговор и дел од супер непријатели против дел од македонскиот политички спектар, со цел да се обезбедело гласање. Тоа не е точно, бидејќи во Северна Македонија денес е присутен висок претставник на најпријателската држава на Северна Македонија – САД, тој е во Северна Македонија како дел од неговите редовни посети во регионот бидејќи високиот претставник Ескобар е висок претставник за Европа и специјален претставник за Западен Балкан. Тоа не е негова прва посета ниту пак ќе биде последна посета“, порача Ковачевски.
Ескобар од вчера е во дводневна посета на Македонија. Тој вчера се сретна со претседателот Стево Пендаровски, утрово имаше состанок со премиерот Ковачевски, а за пладне е најавена средба со Мицкоски. На состанокот со премиерот беа присутни и Артан Груби, вицепремиер за политички систем и односи меѓу заедниците, Бојан Маричиќ, вицепремиер за европски прашања, Бујар Османи, министер за надворешни работи, Кренар Лога, министер за правда, како и министерката за култура, Бисера Костадиновска Стојчевска.
Тој посетата на Македонија ја најави по отпочнување на процесот за уставни измени, кој запре, бидејќи власта немаше обезбедно двотретинско мнозинство за носење на предлог амандманите.
Фото: Борис Грданоски