ЕПП бара да се укине правото на азил при „хибридни напади“ со мигранти

Европската народна партија сака да овозможи враќање на мигрантите без поединечна проценка на нивните барања за азил во случаи на „хибридни напади“ од трети земји насочени кон границата на ЕУ – предлог што е контроверзен и веројатно ќе наиде на политичко противење.
Европската народна партија (ЕПП) ќе побара суспензија на правото за поднесување барање за азил во ЕУ во случаи на „хибридни напади“, при што трети земји поттикнуваат миграција од големи размери со цел дестабилизација на европската граница.

Оваа контроверзна мерка би овозможила враќање на мигрантите без поединечна проценка на нивните околности, што всушност би довело до „колективно враќање“ (т.н. „pushbacks“), постапка што е забранета според сегашното законодавство на ЕУ.

Мерката би можела да биде дел од новата „Европска рамка за итен одговор“, најавена од претседателката на Европската комисија, Урсула фон дер Лајен, во нејзиниот говор за состојбата на Унијата, со цел справување со нерегуларните пристигнувања. Некои земји од ЕУ веќе привремено го суспендираа правото на барање азил и ја поддржуваат оваа мерка. Сепак, предлогот наиде на критики од левичарски политичари и експерти за миграција. Барањето на ЕПП е дел од резолуција што треба да биде усвоена во вторник на политичкото собрание на партијата во Тулуз, според неколку партиски извори.

„Има одредени делегации што се против, но мнозинството во партијата ја поддржува иницијативата“, изјави висок член на ЕПП за „Еуроњуз“ (Euronews).

Во текстот до кој дојде „Еуроњуз“, ЕПП ги повикува земјите-членки „да усвојат дополнителен протокол за азил и миграција со кој се дозволува одбивање влез или враќање без спроведување поединечна процедура за азил за илегални мигранти кои се користат во хибридни напади“.

Во текстот се наведува ситуацијата во Сеута, каде што кон крајот на јули околу 80.000 мигранти влегле на нерегуларен начин, а неколку илјади сè уште се наоѓаат на улиците на оваа шпанска ексклава. Овој настан беше опишан како „хибриден напад и инструментализација на мигрантите“ во неодамнешната резолуција на Европскиот парламент.

„Слични случаи бараат одговор што ги надминува сегашните инструменти наменети за справување со миграциските текови“, се наведува во резолуцијата.

ЕПП е најголемото политичко семејство во ЕУ, а нејзините предлози честопати го обликуваат законодавството што го усвојува Европската комисија и го поддржува Европскиот парламент. Во тековниот мандатен период, партијата зазеде построг став во однос на миграцијата, поддржувајќи законски решенија за депортирање на барателите на азил и на ирегуларните мигранти во трети земји со кои тие немаат никаква поврзаност. Минатиот јуни, ЕПП усвои уште една резолуција со која се повикува Европската комисија да го ограничи правото на азил „во случаи на инструментализација“ и кога ирегуларните мигранти се обидуваат да влезат во ЕУ од трета земја што се смета за „безбедна“.