Енергетски ваучери за повеќе категории ранливи лица предложи РКЕ
Регулаторната комисија за енергетика и водни услуги достави до Министерството за економија предлог за проширување на категориите на ранливи потрошувачи.
Како што соопшти Комисијата, станува збор за иницијатива на РКЕ, која предлогот го подготви во соработка со Електродистрибуција, по препорака на Енергетската заедница со цел да се намали енергетската сиромаштија кај домаќинствата кои не се во целосна финансиска кондиција да ги подмират сметките за електрична енергија.
-Предлогот опфаќа принципи врз основа на кои може да се дефинираат критериуми по кои ќе се утврдат потрошувачите, односно домаќинствата кои ќе влезат во категоријата на ранливи потрошувачи, наведуваат од Комисијата.
РКЕ предлага дополнително да се опфатат и следните категории на потрошувачи коишто би користеле енергетски ваучер и тоа: домаќинства кои добиваат постојана социјална парична помош согласно закон, домаќинства во кои нема ниту еден вработен, кои не се корисници на постојана социјална парична помош и немаат друг извор на приходи; домаќинства кои имаат невработено лице, корисник на паричен надоместок во случај на невработеност од Агенцијата за вработување, кој се движи во висина на постојана социјална парична помош и истиот е единствен приход на домаќинството; домаќинства со повеќе од два члена во кои има еден пензионер што добива минимална пензија (прва група) и истата е единствен приход на домаќинството; домаќинства со повеќе од два члена во кои има само еден вработен со минимална плата, чиј износ се движи во висина на постојана социјална парична помош и нема други приходи во домаќинството; домаќинства кои имаат невработено лице од 1 април 2020 година, корисник на паричен надоместок во случај на невработеност од Агенцијата за вработување, кој се движи во висина на постојана социјална парична помош и во домаќинството има дополнителен приход во висина од минимална плата, заклучно со периодот на тарење на пандемијата. Со ова, практично и формално ја започнуваме иницијативата со која сакаме да го зголемиме опфатот на домаќинствата кои не можат во целост да ги подмират фактурите за електрична енергија, или поголем дел од нивните приходи одат за плаќање на фактурите. Целта е преку субвенционирање на одредена сума од страна на државата да се надмине овој проблем, изјави Марко Бислимоски, претседател на Регулаторната комисија за енергетика и водни услуги.
Проширувањето на постојните групи на ранливи потрошувачи е иницијатива која е заснована врз начелата кои Секретаријатот на Енергетската Заедница со седиште во Виена ги промовира за социјална енергетска заштита на ранливите потрошувачи, посочуваат од РКЕ.
Неодамна, директорот на Секретаријатот, Јанез Копач, укажа дека неопходно е да се обезбеди заштита на ранливите потрошувачите. Во телефонскиот разговор кој Копач го имаше со Бислимоски пред неколку месеци посочи дека националното законодавство опфаќа и правила кои се однесуваат на енергетска сиромаштија во која се дава можност на државата да субвенционира дел од фактурите за потрошена електрична енергија за најранливите категории.
-Дополнително треба да се разгледа можност да се воведе привремена мерка која ќе значи проширување на опфатот на потрошувачи кои ќе влезат во групата за субвенционирање на сметки со вклучување на граѓани кои се директно економски погодени од здравствената криза на пример оние граѓани кои останале без примања. Но тоа не значи дека секој треба да добие помош. Државата не треба да ги субвенционира фактурите за електрична енергија на највисоко платените менаџери и други граѓани со високи примања, кои се субвенционирани со нереално ниски цени на електрична енергија во моментов, изјави Копач (август 2020 година), се наведува во соопштението од РКЕ.