Електронска платформа за објавување научни епидемиолошки студии за рак

Министерот за здравство Фатмир Меџити денеска оствари средба со деканот на Медицинскиот факултет професор, Светозар Антовиќ, и професорката Весна Велиќ-Стефановска, раководителка на Институтот за епидемиологија, по повод првото воспоставување на националната електронска платформа за објавување научни епидемиолошки студии за состојбата со малигни заболувања во земјава.

„Првпат воспоставуваме национална електронска платформа за објавување научни епидемиолошки студии за рак на простата, рак на матката, рак на дебелотпо црево, на дојката и на црниот дроб. При креирањето на методологијата за работа искористени се искуствата на земјите членки на ЕУ и Соединетите Американски Држави. Во нив е прикажана просечната годишна процентуална промена на секое од петте малигни заболувања за периодот од 2014 до 2022 година, и тоа по пол, возраст и општини“, вели Меџити.

Сите истражувања ќе бидат поставени на електронска платформа отворена за сите профили на здравствени работници, како и студенти, магистранди и докторанди на факултетите за медицина, стоматологија и фармација. Платформата ќе биде отворена и за здруженијата на пациенти со малигни заболувања и сите други заинтересирани лица и институции.

Остварувањето на оваа иницијатива е од национален интерес и ќе овозможи поврзување со сите релевантни светски бази на податоци, истакнуваат од Министерството.