“Eleftheros Typos”: Shtohet shtypja ndërkomëtare për zgjidhjen e çështjes së Shkupit


Pas ngjarjeve të brendshme politike në Greqi, akuzat në relacion pushtet-opozitë dhe dallimet ndërmjet partnerëve të koalicionit në Qeveri për shkak të çështjes së emrit, gjatë ditëve të fundit Maqedonia është një ndër temat kryesore në mediat greke, përcjell Telegrafi Maqedoni.

Siç informon AIM, botimi javor i gazetës “Eleftheros Typos” në tre faqe e analizon marrëdhëniet Maqedoni-Greqi. Në pjesën e parë, në analizën me titull “Shtohet shtypja ndërkombëtare për zgjidhjen e çështjes së Shkupit”, paralajmëron se në periudhën e ardhshme, e veçanërisht para Samitit të NATO-s në korrik, nuk përjashtohet mundësia të shtohen shtypjet ndëkombëtare për zgjidhjen e kontestit shumëvjeçar. Sipas gazetës greke, SHBA-të tanimë kanë probleme shumë më serioze siç janë Lindja e Mesme dhe Turqia dhe nuk do të donin edhe një problem në Ballkan.

Edhe deklaratat e ambasadorit amerikan në Athinë, Geoffrey Pyatt për përkrahje të Greqisë dhe optimizmi për zgjidhjen e kontestit, zbulojnë disponimin e SHBA-ve.

Por, përfaqësuesit e Qeverisë greke, në veçanti Ministri për punë të jashtme, në të kaluarën disa herë kanë dërguar porosi se zgjidhja e problemit me emrin është parakusht për anëtarësimin e Maqedonisë në NATO dhe BE.

“Eleftheros Typos” shkruan se në kontestin e emrit nuk priten zhvillime thelbësore deri në fund të janarit, për kur është caktuar takimi i dytë i ndërmjetësit Nimetz me përfaqësuesit e dy shteteve.

“Të gjithë presin të shohin se a do të dakordohet diçka me Shkupin dhe cili do të jetë propozimi konkret për emrin”, shkruan gazeta greke.

Në shkrimin e “Eleftheros Typos” komentohet se në kontestin e emrit, Greqia ndoshta në të kaluarën ka humbur shumë beteja, veçanërisht me njohjen e Maqedonisë nga shtete të ndryshme, por nuk e ka humbur luftën dhe nga ajo mund të dalë si fitimtar. Duhet vetëm të “jetë e përgatitur për rrethanat, të dorëzojë propozim të qartë, të negociojë fortë dhe në anën e saj do ta ketë përkrahjen më të fuqishme politike”.