ЕИБ инвестирала 853 милиони евра во Западниот Балкан во 2021 година за поддршка на зелени и дигитални проекти

Европската инвестициска банка (ЕИБ) минатата година инвестирала вкупно 853 милиони евра во државите од Западниот Балкан, наменети за одржлив развој, зелена транзиција, дигитализација и за поддршка на малите бизниси.

За малите и средните претпријатија се инвестирани 560 милиони евра како помош за одржување на ликвидноста, инвестициите, задржувањето на работните места и создавањето на нови можности за вработување. Минатата година, ЕИБ ставила на располагање и 257 милиони евра за заштита на животната средина, побезбедни и ефикасни енергетски мрежи, одржлив транспорт и воведување на климатски погодни проекти меѓу малите компании.

– Заедно со Европската комисија и другите партнери, ЕИБ планира да ја зголеми поддршката за да му помогне на регионот да го забрза спроведувањето на Зелената агенда, велат од банката.

Оттаму посочуваат и дека со приближно 200 милиони евра инвестирани во дигиталниот сектор на Западен Балкан од 2020 година, ЕИБ е еден од најголемите двигатели на дигиталната трансформација во регионот на Западен Балкан.

– Нашата поддршка беше опиплива не само во финансирање, туку и преку зголемување на нашата техничка поддршка за имплементирање на Економскиот и инвестицискиот план, како и Зелената агенда во Западен Балкан која ќе го постави курсот кон почиста животна средина и подобри услови за живот. Ние му помогнавме на регионот да се адаптира на новата дигитална ера преку отклучување на значителни средства за подобрување на дигиталната инфраструктура и вештини. Сега, со лансирањето на ЕИБ Глобално, ќе бидеме во позиција да реагираме веднаш и да допреме до конкретните потреби на терен, да го прошириме нашето партнерство и знаење и умеење до држави и региони на кои тоа им е најпотребно. Тоа отвора ново поглавје и го издигнува нашиот достиг надвор од ЕУ, овозможувајќи ни уште поуспешно да го управуваме кормилото на дигитализацијата, активностите за климатските промени и инклузивен раст, вели Лилјана Павлова, потпретседателка на ЕИБ одговорна за Западен Балкан.

Европската инвестициска банка (ЕИБ) е институција за долгорочно кредитирање на Европската Унија во сопственост на нејзините земји-членки. Таа овозможува долгорочно финансирање за здрави инвестиции со цел да се придонесе кон целите на политиките на ЕУ.