ЕЦБ размислува за намалување на каматните стапки бидејќи инфлацијата забавува

Членот на Управниот совет на ЕЦБ и гувернер на Банката на Шпанија, Пабло Хернандез де Кос изјави дека Европската централна банка би можела да започне со намалување на каматните стапки во јуни по континуираното забавување на инфлацијата во еврозоната.

„Од денес, најверојатното сценарио е јуни да го донесе првото намалување на стапките“, рече Де Кос.

Неговите коментари доаѓаат откако инфлацијата во еврозоната неочекувано се намали минатиот месец, зајакнувајќи ги аргументите ЕЦБ да почне да ги намалува трошоците за задолжување од рекордно високо ниво.

Растот на потрошувачките цени во 20-те земји кои го делат еврото забави на 2,4 отсто во март од 2,6 отсто во февруари, спротивставувајќи се на очекувањата дека стапката ќе остане стабилна бидејќи цените на храната, енергијата и индустриските стоки се повлекуваат. Главната бројка е пониска, пренесува Ројтерс.

Базичната инфлација, која ЕЦБ внимателно ја следи за да ја мери издржливоста на ценовните притисоци, во меѓувреме падна на 2,9 отсто од 3,1, што е под очекуваните три отсто, покажаа податоците на европската статистичка агенција Еуростат.

„Податоците беа позитивни, дополнително намалување на инфлацијата, исто така и на базичната инфлација. Што е најважно, тие се компатибилни со мартовските прогнози на ЕЦБ“, рече гувернерот на Банката на Шпанија.

ЕЦБ беше претпазлива во почетокот на олабавувањето на политиката, бидејќи очекува инфлацијата да се врати на целта од два отсто дури следната година.

Во своите квартални економски проекции објавени во март, ЕЦБ ја намали прогнозата за раст на цените оваа година од 2,7 отсто на 2,3 отсто и рече дека сега очекува инфлацијата да падне на 1,9 отсто во летото 2025 година.

„Дозволете ми да нагласам дека ова не е безусловна проекција, дека очигледно ќе продолжиме да добиваме информации кои ќе треба внимателно да се анализираат“, изјави Де Кос.

Се очекува централната банка да ја потврди подобрената перспектива на состанокот следната недела, но креаторите на политиката веројатно нема веднаш да ги намалат стапките.

Аналитичарите не гледаат речиси никакви шанси за намалување на каматните стапки на состанокот на Управниот совет на ЕЦБ на 11. април, но се целосно сигурни дека ќе го направат потегот во јуни, по што ќе следат уште два или три чекори подоцна оваа година.