Џафери: Штом владата е во оставка, нема ни пратенички прашања

Претседателот на Собранието, Талат Џафери, ги отфрли тврдењата на опозиџцијата дека без оглед на заминувањето на Зоран Заев од премиерската функција и владата во оставка, пратенички прашања треба да има. Според него, нецелисходно е да има пратенички прашања кога владата е во оставка.

Џафери на брифинг со медиумите денеска најави дека на почетокот на денешната седница ќе биде констатирана оставката на Заев, но, како што рече, нецелисходно е да продолжи седницата за пратенички прашања, со оглед на тоа што Владата е во оставка.

Тој нагласи дека оваа влада останува на должност до изборот на новата влада, ама само на техничко ниво. До изборот на нова влада нема да има нови седници, затоа што владата во оставка не би требало да предлага закони.

Гордана Силјаноска (ВМРО-ДПМНЕ) вчера изјави дека е невообичаено на седница за пратенички прашања да се констатира оставка и да им се оневозможи на пратениците да им поставуваат прашања на министрите.