Џафери побара од пратениците да ги откажат сите службени и приватни патувања

Оа кабинетот на претседателот на Собранието Талат Џафери испратија соопштение по прекинот на седницата и ургентно свиканата координативна средба на лидерите на партиите од владеечката коалиција.  Според соопштението, Џафери побарал пратениците да работат тоа за што ги плаќаат граѓаните, а политичките разлики да ги решаваат на друго ниво, а не во парламентот. Тој наедно им наложил да ги откажат патувањата за да работи Собранието. 

„На денешната седница на Собранието на списокот за присутни пратеници беа потпишани 85 пратеници, а во салата беа присутни 58 пратеници.Претседателот Џафери од пленарната сала ги повика пратениците да влезат во сала, за да може пленумот да продолжи со работа, при што, поради немање кворум, мораше да ја прекине седницата и ги повика сите лидери на политичките партии од владејачкото мнозинство на средба во неговиот кабинет.

На средбата, претседателот потсети дека сите пратеници во Собранието се еднакви и ги претставуваат граѓаните кои ги избрале и им дале мандат. Со ваквото однесување се покажува дека за одредени пратеници приоритет е нешто друго, а не практикување на мандатот кој што им е доверен од граѓаните. Претседателот посети дека тој е секогаш подготвен седниците да ги започне на време доколку пратениците се присутни во сала. Тој исто така нагласи дека доколку има какви било разлики во одредени ставови внатре во коалицијата, истите треба да се решат на друго ниво, не во пленарната сала.

Дополнително, претседателот нагласи и дека согласно Одлуката на претседателството, се наложува да се одложат и откажат сите службени и приватни патувања на пратениците што не се неопходни во текот на месец јули со цел непречено работење на Собранието“, соопштија од кабинетот на Талат Џафери.