Две години без Горан Стефановски: Ние растевме, да растат и генерациите што доаѓаат со неговите драми
Издавачката куќа „Полица“ на Саемот на вчера го промовира своето ново издание, драмски избор од Горан Стефановски, кој ги опфаќа драмите: „Диво месо“, „Лет во место“, „Хај-фај“, „Дупло дно“, „Баханалии“ и „Демонот од Дебар Маало“.
За драмскиот автор, писател, драматург и професор Горан Стефановски, како и за неговите драми зборуваше театрологот Ана Стојаноска. Таа потенцира дека без Горан Стефановски не постои македонската драма и театар.
Раскажуваше за Горан Стефановски, за нивното пријателство, за дискусиите што ги воделе за драмите, за тоа што е драмски автор, што значи тој за театарот воопшто. Потсети дека веќе две години Стефановски не е меѓу нас, а 46 години се поминати од неговиот влез во македонската драма и театар со претставата, односно со драмскиот текст „Јане Задрогаз“.
Таа го поздрави објавувањето на книгата и апелираше читателите одново да ги прочитаат, препрочитаат драмите на Стефановски и тие повторно се постават на сцена, низ македонските театри.
– Ова е одлично време Горан Стефановски да се постави на сцена, повторно и повторно. Сето ова невреме ќе заврши, кога тогаш, и ние пак ќе се вратиме во театар. Повеќе од потребен ни е да го слушаме, да го гледаме, да растеме, да растат генерациите што доаѓаат со неговите драми. Исклучително важен драмски автор, неверојатен зошто се она што е македонска современа драма, македонски модерен театар не би постоел ако не постоеше Горан Стефановски, рече Стојаноска. Додаде дека репликите од неговите драми на сите им се познати и се користат сè уште.
Даде предлог да има година на Горан Стефановски и сите македонски театри да постават по една негова драма. Смета дека тоа ќе биде провакција за секој млад актер, режисер, драмски автор и сл.
2020-09-1