Дванаесет лица се тестираат за коронавирус

Дванаесет лица се тестираат за коронавирус информира министерот за здравство, Венко Филипче, на денешната прес-конференција.

Според него, станува збор за две лица кои пред 5-6 дена се вратиле здрави од Италија, а утрово развиле симптоми, потоа осум лица од Дебар – соседи на тројца заболени со коронавирус со кои живееле во лепенка и со кои имале интензивни контакти и по едно лице од Кочани и од Прилеп.

Резултатите се очекува да бидат готови за околу два часа.

Првата пациентка кај која беше дијагностициран коронавирус се очекува наскоро да биде пуштена од болница откако тестот за коронавирус се покажал негативен.

Филипче рече дека останатите шест заразени со коронавирус се во стабилна состојба, со лесна клиничка слика.

Министерот вели дека тестови во овој момент има доволно, но ќе се обезбеди резерва. Има и доволно распираторни машини и мобилни рентген апарати.

„Сега за сега капацитетот на Инфективната клиника е доволен“, кажа министерот.

Тој повтори дека препораката за ослободување од работа на еден родител со дете до 10 годишна возраст важи и за државниот и за приватниот сектор и најави дека ќе следуваат казни предвидени со закон за непочитување на препораката од страна на работодавачите.

Двајца родители кои работат во ист сектор, ќе треба едниот да биде ослободен, а и самохраните родители треба да се ослободени од работа.