ДУИ и ВЛЕН во кавга за електронскиот попис
ДУИ ја нарече остварување на едно од серијата националистички ветувања најавата на владата дека ќе организира електронски попис во земјата.
-Уште во 2022 година, лидерот на опозицијата, Христијан Мицкоски, јавно одби да ги прифати резултатите од пописот на населението, алудирајќи особено на фактот дека Албанците сочинуваат 29.5% од вкупната популација.Тој тогаш вети дека, штом ќе дојде на власт, ќе организира „електронски попис“ за да ги „коригира“ резултатите.Ова не е изолиран случај, туку дел од серија националистички ветувања собрани под слоганот „да им се покаже местото на Албанците“. Затоа не нè изненадуваат чекорите на овој сегмент на власта, ниту пак институциите кои успеаја да ги заробат, како што се Уставниот суд, Јавното обвинителство и други, порачаа од ДУИ.
Според нив секоја од овие институции активно работи на спроведувањето на изборната програма на ВМРО и на ветувањата на Мицкоски: преку укинување на Балансерот, уривање на механизмите за заштита од мајоризација, отстранување на албанскиот јазик од институциите, како и исклучување на Албанците од повисоките позиции во администрацијата, безбедносните служби, одбраната итн.
-Но, она што е навистина потресно е што остатоците од ВЛЕН во оваа влада, преку шокантна подршка, ја легитимираат и практично ја потврдуваат оваа политика на власта. Уценети и заробени, тие создаваат лажна слика дека владата е мултиетничка и дека во неа некој ги штити интересите на Албанците. Албанците не се наивни и никогаш нема да прифатат да бидат предмет на „дигитален инженеринг“ од страна на власта ,без оглед на тоа што во таа операција активно учествуваат и Албанци од ВЛЕН.Овие обиди нема да поминат. За тоа ги уверуваме и Албанците, но и тие што стојат зад овие опасни обиди за иднината на државата, порачуваат од ДУИ.
ВЛЕН пак им возврати дека останале неми на одлуката на Уставниот суд, кој ја прогласи за неуставна поделбата на населението во пописот од 2021 година на „резиденти“ и на „нерезиденти“.
-Кој ја донесе одлуката да биде избришана албанската дијаспора од пописот на населението во 2021 година? По која цена беа продадени Албанците во овие валкани зделки?“, прашуваат од коалицијата, истакнувајќи дека ВЛЕН ќе бара кривична одговорност за сите кои ја измислиле категоријата „нерезиденти“ и така, без правна основа, ја исклучиле дијаспората од официјалните податоци, порачаа од ВЛЕН.
Од коалицијата истакнуваат дека не се разговарало за нов попис пред да дојде редовниот рок и дека евентуален иден попис мора да произлезе од „длабинска анализа и од политички консензус“. Според ВЛЕН тој попис мора да ја исправи, како што велат од коалицијата, измамата на СДСМ и ДУИ и да гарантира праведен и инклузивен процес.
„ВЛЕН останува цврсто во одбрана на албанската дијаспора, која со децении е главен столб на економскиот, социјалниот и на националниот опстанок на Албанците во Северна Македонија. Тие не се ‘нерезиденти’, туку се неразделен дел од нашата нација и директен придонесувач за развојот на нашата земја“, се наведува во реакцијата.
Според ВЛЕН, „предавството што ДУИ го изврши против дијаспората никогаш нема да се заборави“, но одлуката на Уставниот суд, велат, значи враќање на достоинството на Албанците.
„Ова е победа за вистината и за правдата. Албанската дијаспора претставува и ќе продолжи да претставува легитимен дел од националниот процес на донесување одлуки. Вреди секогаш ќе стои на нејзина страна“, порачуваат од коалицијата.