ДУИ бара фер пристап од медиумите за „третиот кандидат за премиер“

Фото: Б. Грданоски

Демократската унија за интеграција го поздравува апелот на Агенцијата за медиуми за обезбедување баланс во посебните информативни емисии.

Агенцијата во своето соопштение ги потсетува радиодифузерите дека во рамките на посебните информативни емисии – дебати, соочувања, интервјуа итн. треба да обезбедат еднаков пристап и правичност, избалансираност и непристрасност. Воедно Агенцијата потсетува на обврската на медиумите да ги канат сите учесници на изборите, додавајќи дека е неважно на кој јазик ја емитуваат програмата.

-Ова соопштение претставува одговор на писмото кое ДУИ како заинтересирана страна го испрати до Агенцијата за медиуми, соочувајќи се со бојкот на медиумите при организирање на дебатите и јавните соочувања, каде медиумите ги канат кандидатите за премиер на СДСМ и ВМРО – ДПМНЕ,при што се игнорира првиот кандидат за премиер Албанец,  Насер Зибери. Во оваа прилика сакаме повторно да ги повикаме медиумите, почитувајќи ја во целост нивната демократска одговорност, на претстојните посебни информативни емисии, дебати или соочувања, да ѝ понудат на својата публика фер соочување меѓу тројцата кандидати за премиер, со што ќе го збогатат демократскиот амбиент и информираноста на јавноста, но и ќе ја збогатат програмата на своите гледачи,стои во реакцијата на ДУИ, иако не е јасно зошто само нивниот кандидат го сметаат за онеправдан, бидејќи сите партии што учествуваат во трката теоретски си имаат свои кандидати за премиери, вклучувајќи ги и тие од Алтернатива и Алијансата за Албанците.