Досега највисока казна затвор за бунтовник од Капитол – 5 години
Роберт Палмер од Флорида плачеше додека ѝ кажуваше на судијката дека неодамна гледал видео од неговите постапки тој ден и не можел да поверува што гледа
ВАШИНГТОН – Бунтовник од Капитол, кој на 6 јануари ги нападна полицајците кои се обидуваа да ја задржат гневната толпа, беше осуден во петокот на повеќе од пет години зад решетки, најмногу досега за сите осудени во бунтот.
Роберт Палмер (54) од Ларго, Флорида, плачеше кога ѝ кажуваше на американската окружна судијка Тања Чуткан дека неодамна гледал видео од неговите постапки тој ден и не можел да поверува што гледа.
„Ваша чест. Навистина се срамам од она што го направив“, рече тој плачејќи.
Палмер беше еден од неколкуте демонстранти осудени во петокот пред судот во Окружниот Колумбија за нивните постапки на 6 јануари. Голем број полицајци беа претепани и крвави, пет лица загинаа и беше направена штета од околу 1,5 милиони долари на Капитолот на САД. Палмер е 65-тиот обвинет на кој му е изречена казна. Обвинети се над 700 лица.
Пред изрекувањето на пресудата на Палмер, најдолгата затворска казна изречена за бунтовник на Капитол беше 41 месец. Тоа беше казната што ја добија и Џејкоб Чансли, мажот од Аризона кој носеше шапка од крзно со рогови, беше со голи гради и боја за лице во Капитол; и сопственикот на теретана во Њу Џерси, Скот Ферламб, првиот човек осуден за напад на службеник за спроведување на законот за време на немирите.
„Треба да биде јасно… обидот за запирање на мирната транзиција на власта и нападот на службениците за спроведување на законот ќе бидат дочекани со одредена казна“, рече судијата. „Ќе има последици. Јас не правам пример од тебе. Те осудувам за однесувањето што го направи“. (АП)