До 3 април „Визер“ нема да лета до Милано, Тревизо и Бергамо

Фото: Б. Грданоски

Нискобуџетната авиокомпанија „Визер“ објави дека ги суспендира до 3 април годинава рутите од Скопје и од Охрид кон Милано (MXP), Тревизо (TSF) и Бергамо (BGY), поради затворањето на северниот дел на Италија, а со цел да се спречи ширењето на корона вирусот.

„Патниците кои направиле резервација во овој период ќе бидат автоматски известени и ќе бидат сместени на алтернативни рути во најрано можно време. Сите оние кои имаат букирано директно на wizzair.com или на мобилната апликација на авиокомпанијата ќе добијат известување на нивната електронска пошта, каде ќе им биде понудена бесплатна повторна резервација, целосен поврат на нивните средства или 120 проценти поврат на цената во кредити. Патниците можат да одберат помеѓу горенаведените опции со кликнување на линкот на нивната електронска пошта и лесно да ја одберат најдобрата опција преку нашата платформа за само-користење, соопшти Визер.

Од авиокомпанијата наведуваат дека може да ги информираат само патниците кои нивната резервација ја направиле преку wizzair.com или на мобилната апликација на „Визер“. Патниците кои имаат резервирано преку туристички агенции – вклучувајќи ги онлајн туристичките агенции – треба да стапат во контакт со компанијата преку која ги купиле нивните билети.

И во соседно Косово властите побараа времено одложување на сите летови од северна Италија до меѓународниот аеродром во Приштина.

Како што јави дописникот на МИА од Приштина, министерот за инфраструктура и животна средина на Косово, Љумир Абдиџику на неговата страница на Фејсбук информирал дека забраната на летовите од регионот кој италијанските власти го ставија под карантин е препорачана од Националниот институт за здравство.