Директорот на словенечката новинска агенција поднесе оставка по притисокот од владата на Јанша

Шефот на словенечката новинска агенција СТА поднесе оставка во четвртокот (30 септември), обвинувајќи ја владата дека се обидува „да ја потчини агенцијата“ со задржување финансиски средства. ЕУ изрази „сериозна загриженост“ и ги повика словенечките власти да го сменат „негативниот тренд“ во однос на слободата на медиумите.

Бојан Веселиновиќ во изјавата рече дека „не може и нема да ги прифати условите што ги постави владиниот претставник за финансирање на работата што нашата агенција ја прави бесплатно во последните 273 дена“.

Љубљана го суспендираше финансирањето на СТА минатиот декември, откако конзервативниот премиер Јанез Јанша го критикуваше нејзиното известување за кризата со корона вирусот, нарекувајќи го „срам“ и побара Веселиновиќ да биде сменет.

Администрацијата на Јанша не се повлече дури и откако Врховниот суд нареди владата да продолжи со финансирањето на мисијата на јавниот сервис на СТА, наведувајќи ги правните спорови околу договорот за финансирање.

Недостатокот на средства се закани дека ќе ја прекине работата во СТА, основана во 1991 година, и исплатата на платите на околу 90 вработени.

Минатата пролет Словенското новинарско здружение (ДНС) организираше кампања за донации која собра повеќе од 270.000 евра за да ѝ помогне на агенцијата да преживее.

Но, тоа е многу помалку од двата милиони евра што агенцијата ги добиваше од јавните фондови секоја година.

Потпретседателката на Европската комисија за вредности и транспарентност, Вара Јоурова, ги повтори повиците за враќање на финансирањето на СТА во писмото испратено до владата минатата недела.

Таа предупреди дека сегашната ситуација „претставува голем ризик за слободата на медиумите и плурализмот на медиумите во Словенија и, следствено, во ЕУ“. (АФП)