Димитров во Загреб: Целосна поддршка од Хрватска за почеток на преговорите

На денешните средби во Загреб вицепремиерот за европски прашања, Никола Димитров, доби целосна поддрпка за македонскиот пат кон Европската унија. Димитров се сретна со хрватскиот премиер Андреј Пленковиќ и со министерот за надворешни работи Гордан Грлиќ-Радман и при тоа се зборувало  очекувањата и изгледите за придвижување на пристапниот процес за Македонија, како и за домашните реформи и билатералната соработка. Димитров претходно беше во посети на Германија и Словенија.

„Токму овде во Загреб, пред две декади ја парафиравме Спогодбата за стабилизација и асоцијација со која започна нашиот евроинтегративен пат. Пријателска Хрватска била и останува еден од нашите најголеми поддржувачи во процесот на пристапување, а нивните заложби и посветеност се потврдија и за време на претседателството со Унијата кога во март 2020 година го добивме зеленото светло за почеток на преговорите“, рече Димитров.

Димитров посочи дека со премиерот Пленковиќ заеднички констатирале дека е потребно што е можно побрзо да се постигне консензус за Преговарачката рамка и да се одржи првата Меѓувладина конференција со Северна Македонија.

„Крајно време е оваа одлука да стане реалност, порача вицепремиерот Димитров.

Соговорниците, како што соопшти СЕП, се осврнале и на тековната билатерална соработка која вклучува и конкретна поддршка за јакнење на националните административни капацитети за усогласување на законодавството со правото на ЕУ како и споделување на хрватските искуства за унапредување на координативните механизми и преговарачката структура. ​