Димитров: Во најтешките моменти за Италија, Ди Мајо нѝ честита за ЕУ успехот

Министерот за надворешни работи Никола Димитров денеска имаше телефонски разговор со италијанскиот министер за надворешни работи Луиџи Ди Мајо, на барање на италијанска страна.

Ди Мајо му честиташе на Димитров за позитивната одлука на Советот за општи работи на ЕУ за отпочнување на пристапни преговори со Северна Македонија, истакнувајќи дека и покрај тешките моменти во кои се наоѓа неговата земја, сака да им честита на македонските граѓани за овој долгоочекуван успех.

Димитров заблагодарувајќи му се на својот италијански колега за континуираната поддршка, но пред се’ за вниманието и посветеноста која ја добиваме од Италија токму во нејзините најтешки моменти предизвикани од пандемијата, потенцираше дека ова значајно постигнување за Северна Македонија е истовремено и успех на Италија и на самата Унија.

Изрази длабоко сочувство до италијанските граѓани за големиот број жртви и упати желби за поскоро оздравување на оние кои се’ уште се борат со болеста, како и за што поскоро надминување на сите предизвици со кои се соочува Италија во овие тешки мигови.