Димитров се сретна и со словенечкиот претседател Пахор

Официјалната посета на Љубљана вицепремиерот за европски прашања Никола Димитров ја заокружи со средбата со претседателот на Република Словенија Борут Пахор, со кого во пријателска и непосредна атмосфера беа разменети мислења за актуелните состојби во регионот.

 

Соговорниците се согласија дека евентуалниот неуспех на ЕУ во постигнувањето консензус за отпочнување на преговорите со Северна Македонија ќе има регионални импликации и затоа е неопходен одлучен и навремен исчекор на евроинтегративниот пат, со што ќе се даде нова искра на политиката на проширувањето.

 

Претседателот Пахор го информираше вицепремиерот Димитров дека своите заложби и поддршката на европската перспектива на Северна Македонија ќе ги реафирмира на претстојниот Брдо Бриони Самит.

 

Претходно во текот на денот Димитров имаше разговори со својот словенечки колега Анже Логар и во словенечкото собрание. На средбата со претседавачот на Комитетот за европски работи во словенечкиот парламент, Марко Погачник и со претседавачката на Комитетот за надворешна политика, Моника Грегорчич беше реафирмирана одличната билатерална и парламентарна соработка и споделените ставови за подготвеноста на Северна Македонија да ги отпочне пристапните преговори.

Димитров: „Словенија е еден од најблиските пријатели на Северна Маледонија. Таа блискост и тој однос ги надминува политичките идеологии и фамилии. Словенија секогаш била пример како може да се направи пробив на европскиот пат”.

Од словенечка страна беше истакнато дека полноправното членство на Северна Македонија во Европската Унија претставува политички, економски, културен, историски и безбедносен интерес на Словенија.