Димитров: Главниот правец во следната фаза е европскиот пат

Европскиот пат ќе биде главниот пат за државата во периодот што претстои, а нашата најголема битка во следната фаза ќе биде насочена на домашен терен, порача денеска досегашниот министер за надворешни работи Никола Димитров при влезот во Собранието, каде треба да почне седницата на која ќе се избере првиот човек на законодавното тело.

Димитров одговарајќи на новинарско прашање дали е задоволен од позицијата за која е предложен во новиот владин состав, вицепремиер задолжен за европски прашања, истакна дека за него нема поголем предизвик од чекорењето по европскиот пат.

-Јас потекнувам од тоа министерство уште од ’96 година. Меѓутоа мислам дека тоа што успеавме да го направиме преку МНР,  да го отвориме патот, за мене во моментов нема поголем предизвик од изодување на тој пат и мислам дека главниот правец за државата ќе биде европскиот пат и мислам дека ќе ми даде малку поголемо влијание дома. Мислам дека нашата голема битка во следнава фаза сепак е повеќе кон дома, рече Димитров.

Со идниот министер за надворешни ќе седне ќе разговара, со цел работите да се движат во насока на негување на односите што се изградени и одржување на одличниот меѓународен рејтинг на Северна Македонија, но и со цел да се задржи редот во куќата.

-Има уште работа и во смисла на законот, составот на амбасадори што ги номиниравме, кои останаа поради деветте одлагања на претходната Комисија за надворешна политика, иако јас мислам дека и во таа смисла сепак требаше да ги испратиме. Тоа е многу итна работа во моментот, бидејќи дипломатија не може да се води од главнот град, мора да има високи претставници во соседните земји, во европските центри, во светските центри. Така што тие ќе бидат поитните работи, рече Димитров.

Во врска со смената на грчкиот тим во рамки на Комисијата за историски прашања и учебниците, досегашниот шеф на дипломатијата посочи дека има долга пауза во работата на таа комисија, но додаде дека „топката била во Атина“.

-Очекуваме мислам дека следната средба е кај нив. Очекуваме  датум, донекаде ситуацијата со пандемијата тоа го предизвика, ќе се продолжи да се работи, нагласи Димитров.

Претходно на Фесбук Димиторв напиша: – Човек е силен и способен толку колку што му се силни и способни тимот и пријателите. А токму на патот што допрва не’ чека сплотеноста ќе биде клучна. За мене, како човек кој целиот професионален живот го посвети на оваа идеја нема поголем предизвик од тоа да го водам најсуштинскиот и најважен државен процес. Ова е мојата должност, но и должноста на нашата генерација – да ги зацртаме чекорите, да ги впрегнеме најспособните и под светлото на процесот од ден на ден да се менуваме. Му благодарам на идниот премиер Зоран Заев и на СДСМ за довербата да бидам номиниран за вицепремиер задолжен за европски прашања, а вам ви ветувам дека од првиот ден ќе дадам се’ од себе за успешно да ја зграпчиме оваа историска шанса. Одиме напред и ќе бидеме светол европски пример. Одиме напред, таму каде припаѓаме!