Димитар Ковачевски на средба со Дејвид Гир

Претседателот на СДСМ, Димитар Ковачевски заедно со секретарот за меѓународна соработка на партијата, Бојан Маричиќ утрово се сретна со амбасадорот на Европската унија, Дејвид Гир.

Според соопштението од партијата, Ковачевски се заблагодарил на постојаната поддршка од Европската унија и истакна дека како новоизбран претседател на СДСМ и иден претседател на Владата пред себе има поставено неколку приоритети во работата.

„Во овие приоритети, ЕУ ја гледаме како наш партнер. Владата предводена од СДСМ останува посветена на барање заедничко прифатливо решение, согласно европските вредности. За прашањето со Бугарија, има одредени сигнали од премиерот Петков и очекувам да дојдеме до решение. Нашите граѓани сакаат и заслужуваат да живеат по вредностите на стандардите и вредностите на ЕУ, затоа ќе се посветиме на реформите кои овие вредности ги носат во нашата држава“ порача Ковачевски.

Ковачевски истакнал дека идната Влада што тој ќе ја предводи ќе биде составена од докажани, професионални и угледни личности, а работата на Владата ќе се фокусира на зелената агенда, унапредување на економскиот стандард и посветена борба против корупција.

Амбасадорот Гир упати честитки до претседателот Ковачевски за неговиот избор, додавајќи дека и тој и новата Влада ќе продолжат да имаат силен сојузник во ЕУ и дека тоа ќе се покаже на дело. Тој посочи дека Унијата ќе помогне да се дојде до заедничко прифатливо решение со Бугарија со цел Северна Македонија да ги започне преговорите за членство во ЕУ.