Десет кандидати за пет испразнети места во Обвинителството на Абази

За пет испразнети места во Обвинителството за гонење на организиран криминал и корупција, во трка се десет пријавени обвинители. На неодамне распишаниот конкурс на Советот на јавните обвинители се пријавиле пет обвинителки кои се дел од ова обвинителство, но нивниот мандат истекува. Тоа се обвинителките Марија Ѓоргева, Валентина Бислимовска, Енѓелуше Кадриу- Леши, Ивана Алексова -Трајчева и Сузана Мирческа -Кузмановска.

Меѓу кандидатите се и двајцата виши обвинители, Артан Ајро и Трајче Пеливанов, кои пред да бидат избрани во Вишото скопско обвинителство, дојдоа токму од Обвинителството за гонење на организиран криминал и корупција. Овие обвинители беа дел и од згаснатото Специјално јавно обвинителство (СЈО).Тројцата останати обвинители доаѓаат од Скопското обвинителство – Александар Маркоски, Ана Гоговска -Јакимовска и Ана Стојановиќ- Димитровска.

Мандатот на обвинителите е четири години, а со ова Обвинителство раководи Ислам Абази.