Демократската опозиција го обвинува Вучиќ дека ја предава Србија

Поранешниот претседател на Србија, Борис Тадиќ изјави дека она што го кажал Александар Вучиќ за уцената што ѝ била упатена на Србија за да го прифати европскиот план за Косово, говори дека за време на оваа власт Србија била целосно понижена земја.

„Вучиќ цела деценија се фали дека Србија за време на неговото владеење била почитувана земја, која веќе никој не може да ја понижува и уценува. Она што сега го кажа за уцената испратена до Србија јасно покажува дека Србија за време на оваа влада е целосно понижена земја“, напиша Тадиќ на Твитер додека траеше обраќањето на претседателот Вучиќ до јавноста.

За време на обраќањето на Вучиќ, Партијата на слободата и правдата ја твитна изјавата на нејзиниот претседател Драган Ѓилас, кој вели „за мене би било кривично дело некој да го признае Косово, но исто така ќе биде злосторство некој да им ја ускрати европската иднина на генерациите што доаѓаат“.

Вучиќ во своето обраќање до јавноста го кажа она што му го кажаа Западната петорка, односно какви се последиците за Србија доколку не го прифати германско-францускиот предлог, односно европскиот план за Косово.

„Ќе се соочите, под еден, со прекин на евроинтеграцискиот процес, под два ќе се соочите со стопирање и повлекување на инвестициите, под три – сеопфатни мерки во политичка и економска смисла кои ќе ѝ наштетат на Србија. Ова ми беше повторено уште три пати во текот на разговорот и секој пат жестоко реагирав на тоа“, изјави Вучиќ.

„Вучиќ е заложник на политиката во последната деценија. Се стави во оваа позиција од која сега не знае како да се извлече. Не знае како да ѝ објасни на јавноста каков пресврт се најавува. Тој не знае што ќе прави со СПЦ. Не знае што да прави со опозицијата и делови од сопствената партија кои изразуваат незадоволство Нема одговор на прашањето ‘Што добиваме со потпишување договор со Косово, доколку тоа не го забрза членството на Србија во Европската унија’“, изјави новинарот и политички аналитичар Бошко Јакшиќ за телевизијата Н1. Тој додаде дека Вучиќ е „втеран во ќош“ и оцени дека „мора да донесе поинакви одлуки отколку во 2013 година“. „Косово е можеби најскапиот српски збор и не е предмет на продажба, туку е предмет на договор“, посочи Јакшиќ.

Тој додаде дека „по две децении има доволно сигнали кои ни кажуваат дека влегуваме во последната фаза (на преговорите за Косово)“.

Или ќе се реши овој најголем, најкомплексен и најдолг проблем на Западен Балкан, а Србија со помала територија ќе стане стабилна земја или ќе се соочиме со години на тортура, неизвесност и изолација. Ова е сериозен момент, но стана сериозен не благодарение на Белград, туку на вклученоста на западната заедница. „Пет западни дипломати внесоа сосема нови елементи во ситуацијата, бидејќи се решени да го решат овој проблем, а за тоа значително придонесе украинската војна“, смета Јакшиќ.

Зборувајќи за преговорите со Приштина, тој вели дека „топката сега е кај Вучиќ“, и оценува дека прифаќањето на германско-францускиот предлог е суштинско признавање на Косово, но оценува дека Србија нема да има обврска за меѓусебно признавање. .

„Очигледно се работи за две отстапки, едната отстапка е за Косово, бидејќи Косово мора да добие нешто од тој договор, секој мора да добие нешто, за на крајот да се прифати договорот“, вели Јакшиќ.

Коментирајќи го ставот на опозицијата за дијалогот со Приштина, тој рече дека е тажен.

„Постои целосен дефицит на какво било разбирање за сериозноста на оваа државотворна состојба. Сега зборуваме за иднината на Србија, а не за тоа дали Вучиќ ќе остане на власт, и дали некој друг ќе дојде на таа власт… Голем дел од опозицијата нема политика, тоа можевме многупати да го видиме… Политичките актери како што е Вук Јеремиќ, кој учествуваше во креирањето на политиката за решавање на косовскиот проблем, сега се противи на решението, бидејќи доаѓа од Вучиќ. Па, тоа е несериозно“, потенцира Јакшиќ.