Делегација на американската амбасадата во посета на РЕК „Осломеј“

Делегација на амбасадата на САД во Северна Македонија беше во работна посета на РЕК „Осломеј“, со цел да се запознае со работењето на рударско-енергетскиот комбинат, но и со неговиот статус на прв проект за енергетска трансформација во земјата, кој успешно се спроведува преку неколку етапи, соопшти АД ЕСМ.

Заменик-генералниот директор на АД ЕСМ, Имер Зенку, ја запозна економската делегација од американската амбасада со 10-мегаватната фотонапонска електрана „Осломеј 1“, изградена врз поранешното наоѓалиште за јаглен, како и со локацијата за изградба на втора фотонапонска електрана со ист капацитет, и двете во сопственост на АД ЕСМ.

Делегација ја посети и локацијата каде се градат две сончеви електрани од по 50 мегавати, како јавно-приватно партнерство меѓу АД ЕСМ и приватни инвеститори од Бугарија и Турција.

Политичко – економскиот советник во Амбасадата на САД во земјава, Џерек Бас и советникот за економски прашања, Јордан Дамчевски  беа запознати со плановите на АД ЕСМ да го зголеми своето портфолио од обновливи извори на енергија и со одлучниот пристап на компанијата во изградбата на електрани за т.н. чиста електрична енергија, од сонце, ветер и вода.

Значајни капацитети на соларни електрани се подготвуваат за изградба во кругот на РЕК „Битола“, како дел од проектот за енергетска транзиција, кои заедно со електрана на природен гас, согласно усвоената енергетска стратегија на државно ниво, треба да го заменат јагленот во РЕК „Битола“ во следната деценија, се вели во соопштението до медиумите.