Дефицитот во буџетот на Русија само за првиот квартал изнесува 30 милијарди долари

Буџетот на Русија во периодот јануари-март, според прелиминарните податоци на Министерството за финансии, бил извршен со дефицит од 2,4 билиони рубли (30 милијарди долари). Законот за буџетот за цела 2023 година предвидува дефицит од 2,93 билиони рубли, што значи дека оваа сума е речиси постигната за првиот квартал.

Според министерството, буџетските приходи во периодот јануари-март 2023 година изнесуваат 5,677 билиони рубљи, што е за 21% пониско од приходите во првиот квартал од 2022 година. Истовремено, расходите во првиот квартал се зголемени за 34% во споредба со истиот период минатата година – до 8,077 билиони рубли.

Според Министерството за финансии, ваквите показатели првенствено се поврзани со намалување на приходите од нафта и гас поради намалувањето на квотите за нафта од Урал и намалувањето на извозот на гас. Приходите од нафта и гас во првиот квартал се намалени за 45% во однос на истиот период минатата година, на 1,635 билиони рубљи.

Буџетските приходи кои не се од секторот за нафта и гас за првиот квартал изнесуваат 4,042 билиони рубљи, односно се намалени за 4% во споредба со истиот период минатата година. Според агенцијата, ова главно се должи на еднократниот поврат на преплатувањата на данокот на доход за претходните периоди во јануари 2023 година.