Данска остана светски првак во ракомет

Данска ја одбрани титулата светски првак во машкиот ракомет, откако вечерва ја совлада Шведска со 26:24 (13:13) во „скандинавското финале“ на Мундијалот во Египет.

Најзаслужни за триумфот на Данците во Каиро беа Микел Хансен со седум голови и фантастичниот Никлас Ландин со дури 15 одбрани.

Иако Шведска ја имаше предноста во поголемиот дел од првото полувреме, на пауза се замина се нерешени 13:13.

Резултатската неизвесност се провлекуваше до последните 15 минути кога Данците при резултат 20:20 влегоа во серија од 3:0 и на крајот станаа само четвртата репрезентација на која и успеало да ја одбрани титулата светски првак.

Претходно таков подвиг направија, на два пати, Франција и Романија, а еднаш светска титула ја одбрани Шведска.

Претходно во натпреварот за бронзениот медал, актуелниот европски првак Шпанија триумфираше над Франција со 35:29.