Данска нѐ моли да го зграпчиме моментумот на проширувањето на ЕУ

Данската министерка за европски прашања, Мари Бјере денеска во Скопје порача дека проширувањето ќе биде во фокусот на данското претседавање со Европската унија, кое стартува на 1 јули, дека актуелните геополитички случувања уште повеќе го актуелизираат овој процес, како и дека нејзината држава ќе стори сѐ што е во можност за да го поттикне евроинтегрирањето на земјава, но оти тој пат мора да се изоди заеднички.

Бјере денеска на заедничката прес-конференција со министерот за европски прашања Орхан Муртезани на прашањето што конкретно би сторила Данска, како иден претседавач на Унијата, во однос на ингегрирањето на Македонија во ЕУ, имајќи го предвид спорот со Бугарија, но и иницијативата од претседателот на Европскиот совет, Антонио Кошта за средба на македонски и бугарски високи претставници на маргините на Самитот во Хаг, не даде конкретен одговор, но посочи дека моментумот за проширување е тука и оти земјата треба да го зграпчи.

„Моментумот за проширување апсолутно е тука и веќе сме негови сведоци, направен е прогрес и за Украина и за Молдавија, и сега со Албанија отвораме два нови кластера, еден сега, еден на есен, исто така имаме напредок и кај Црна Гора, кој не се случуваше долго време. Искрено да кажам дека моментумот е тука и ве молам да го зграпчите. И сега со нашето претстојно претседателство со ЕУ морам да ви кажам дека ние не можеме самостојно ова да го туркаме, ние сме тука конструктивно да работиме со вас, со Северна Македонија за да можеме заднички да видиме каде можеме да постигнеме напредок, во кои делови можеме да го оствариме напредокот“, истакна данската министерка, додавајќи дека е видливо дека земјава има остварено голем напредок на патот до ЕУ.

Таа во своето обраќање рече дека со Муртезани разговарале за актуелните политички прашања.

Данската министерка истакна дека со оглед на актуелните геополитички случувања, руската агресија врз Украина, но и, како што посочи, новите ветришта, кои дуваат од САД, Европа треба да биде силен геополитички актер, а за да се одбрани себе си во овие новонастаните околности, клучен е процесот на проширување.

„Свесни сме дека имаше еден замор од проширувањето, но тој се појави и во вашата и во нашата земја и затоа сакаме повторно да работиме на проширувањето, да работиме и со Украина и со Молдавија, но и со земјите од Западен Балкан. Сметам дека сето ова ќе донесе просперитет за овие земји, полза и за нив и за вашата земја, но и за Европа“, истакна Бјере.

Таа посочи дека Европа ќе биде посилна доколку е заедно со земјава, но и со другите држави од регионот и додаде дека има еден нов напредок во процесот на проширување и затоа е тука во Скопје за да ѝ даде поддршка на државата.

На прес-конференцијата министерот за европски прашања, Орхан Муртезани, рече дека во време кога процесот на проширување е изложен на притисоци и тенденции на билатерализација, Копенхашките критериуми се нашата заштита.

„Посебно ја цениме принципиелната определба на Данска дека проширувањето на Европската Унија мора да се води исклучиво според Копенхашките критериуми – објективни, мерливи и еднакви за сите. Данска отсекогаш била земја со јасен и конзистентен став во европските процеси. Разговаравме за нашите билатерални односи, за иднината на Европа и за местото на Северна Македонија во тој поширок хоризонт“, рече Муртезани.

Одговарајќи на новинарско прашање за Акцискиот план за малцинства, за кој премиерот Христијан Мицкоски најави дека треба да биде доставен, Муртезани кажа дека Акцискот план е во надлежност на МНР и не може да сподели информации околу неговата содржина.

„Тоа што можам да споделам е околу патоказите, тие трите патокази веќе се испратени во Комисијата и се финализираат на дневна основа, преку онлајн состаноци со Комисијата. Се надевам дека скоро сите три патокази ќе бидат завршени, а со тоа технички, Северна Македонија ќе биде спремна за отворање на Кластерот Темели. Што се однесува до Акцискиот план, тоа што можам да споделам дека е испратен во Советот на Европа којшто треба да биде разгледан од страна на експерти се чека наскоро да добиеме одговор за нивни коментари, по што ќе треба да следи соодветна процедура за усвојување и формално испраќање до Комисијата“, рече Муртезани. (МИА)