Дачиќ: Србија сака компромис со Косово

Српскиот министер за надворешни работи Ивица Дачиќ изјави денеска дека Белград инсистира на дијалог со Приштина, но тоа нема да се случи се додека не се укинат таксите кон Србија.

Дачиќ обраќајќи се на студентите на Парискиот институт за политички науки, истакна дека компромисот не подразбира да „Србија ќе ја признае еднострано прогласената независност на Косово, но дека се уште нема конкретни разговори за тоа каков би бил компромисот“.

– Ние сме подготвени за компромис, но Приштина смета дека нема потреба. Тие мислат дека можат да добијат се и тежнеат кон создавање на голема Албанија. Кој може да гарантира дека ќе има две независни држави, нормално е да се залага за обединување, рече Дачиќ .

Тој оцени дека Србија сака политичко решение кое ќе ги почитува интересите на двете страни, а не решение до кое ќе се дојде под притисок.

– Ваквата еднострана независност никогаш нема да ја прифатиме. Ако Приштина смета дека е готово, зошто се уште сака дијалог, зошто не е во Обединетите нации, рече Дачиќ.

Тој додаде дека Косово ја нема „заокружено“ независноста, бидејќи не е во ОБСЕ, ниту во Обединетите нации, како и дека е потребно уште неколку земји да го повлечат признавањето на независноста, со што ќе се достигне половина од земјите да го немаат признаено Косово.

Запрашан од страна на новинарите што очекува од заминувањето на поранешните команданти на ОВК во Хаг, Дачиќ рече дека очекува пред се да се подигнат обвиненија, што ќе се случи во следните неколку месеци.

Говорејќи за европските интеграции, тој посочи дека напредокот на Србија се гледа преку напредокот на дијалогот со Приштина, но дека поради потезите на Приштина дојдено е до негово прекинување.