Чулев ја потврди кривичната за Димитриевски, градоначалникот на Куманово тврди дека ќе биде прекршочна

Министерот за внатрешни работи, Наќе Чулев вечерва потврди дека е поднесена кривична пријава против кумановскиот градоначалник, Максим Димитриевски.

Чулев за телевизијата 24 информира дека СВР Куманово ја поднел пријавата против Димитриевски по член 206 од Кривичниот законик истакнувајќи дека МВР постапило согласно извештајот од ДЗСИ.

-Во координација со основниот јавен обвинител во текот на денешниот ден беше поднесена кривична пријава против градоначалникот Максим Димитриевски по член 206 од Кривичниот законик од страна на СВР Куманово до Основниот јавен обвинител кој ја прифати пријавата. МВР постапи согласно извештајот од ДЗСИ и согласно тоа СВР Куманово поднесе кривична пријава до ОЈО, е сега ОЈО треба да пушти дополнителни насоки, доколку ние треба да ги реализираме. ОЈО ќе оцени дали треба да бидат преземени дополнителни активности  од страна на МВР, рече Чулев за ТВ 24.

Тој појасни дека известувањето било доставно до Бирото за јавна безбедност, а веднаш потоа било процесуирано до СВР Куманово.

–Случајот со градоначалникот на Куманово, според мене, има и одредена политичка димензија. Меѓутоа, од страна на Комисијата беше доставено соодветно известување до директорот на БЈБ, не до мене, и истото од страна на Бирото за јавна безбедност беше процесуирано до Секторот за внатрешни работи Куманово во текот на денешниот ден. По правило, може да се поднесе известување и до БЈБ, и до министерот за внатрешни работи, и логично би било да биде поднесено и до двете страни, меѓутоа доволно е и едно, така решил ДЗСИ, рече Чулев.

Според Чулев, кумановскиот градоначалник Максим Димитриевски ја испочитувал процедурата за тестирањето.

Градоначалникот Димитриевски пак, за телевизијата 24 појасни дека не располага со информации дека Обвинителството ја прифатило кривичната пријава. Според него, дадени се насоки истата да не се процесуира како кривична, туку да се оди со прекршочна постапка.

-Јас немам информации дека кривичната пријава е прифатена. Техничкиот министер Чулев треба убаво да се информира. Сметам дека е недоволно информиран бидејќи мојот контакт со Основното јавно обвинителство кажува дека на денешните консултации се дадени насоки истата пријава не се процесуира како кривична туку да се оди со прекршочна постапка, рече Димитриевски.

Тој додаде дека доколку навистина следува одговорност, подготвен е да ја понесе, но сметаше дека има огромни пропусти во делот на самата постапка и истата е неиздржана.

– Дополнително добивам информации од Основното јавно обвинителство од Куманово дека истата таква пријава, за која што се вршени консултации, е отфрлена од страна на основниот јавен обвинител, но сепак СВР Куманово решило да поднесе кривична пријава и против мене и против господинот Горан, кој што е раководител на регионалната дирекција на центарот за управување со кризи. Сепак оставам на легитимните државни органи да се произнесат по истата, а овој притисок го отфрлам, уште повеќе охрабрен сум да продолжам со својата борба за доброто на моите кумановчани, додаде Димитриевски.

Тој претходно на својот Фејсбук профил напиша дека кривична пријава претставува „класична злоупотреба на инструментите на власта“ и најави дека ќе продолжи да се бори со истомислениците.

-Кривична пријава? Класична злоупотреба на инструментите на власта. Легитимна постапка со независни и непристрасни професионалци ќе ја покаже вистината. Навикнат сум на борба. И понатаму со ист интензитет заедно со истомислениците ќе продолжам да се борам. Во минатото се борев против режим. Дали е на повидок нешто слично? Мојот приоритет во овие моменти е борба против епидемијата и здравјето на граѓаните. Правдата и вистината секогаш победуваат!, сподели на фејсбук Димитриевски.