Четврта сесија на Филмската училница, учесниците запознати со основите на филмот

Десеттина средношколци и бруцоши, на возраст од 15 до 19 години се запознаваат со основите на филмската историја и теорија, режија, сценарио, монтажа, продукција, филмска камера, актерство, сценографија, костимографија на филм…, на Филмската училница која ја одржа четвртата сесија.

Филмската и ТВ режисерка Марија Џиџева, како што соопштуваат од Кинотеката, дебатираше со посетителите за нивните синопсиси со методот на опсервација, изработени минатата недела, а вишиот филмолог Владимир Ангелов одржа интерактивно предавање чија тема беше трајните митови во светскиот филм низ примерот на филмот Богатството на Сиера Мадре (The Treasure of the Sierra Madre, 1948) на режисерот Џон Хјустон.

Во рамки на четвртата сесија, како што наведуваат, посетителите беа запознати со неколку правци и авторски кругови во светската кинематографија од 30-те, 40-те и 50-те години од минатиот век: францускиот реализам и надреализам, германскиот експресионизам и пропаганден филм, италијанскиот неореализам и неговиот развој…

Филмската училница е проект за креативна едукација од областа на филмот и аудио-визуелното наследство наменет за ученици од средните училишта. Часовите се одржуваат во сабота, а проектот  трае 10 недели.

Проектот е замислен како интерактивна филмска училница, каде младата популација ќе може да се запознае со нематеријаното богатство, пред сè, аудио-визуелното, и ќе добие филмска едукација од областа на историјата на филмот, запознавање со филмскиот јазик и аудио-вузуелното изразување и можност за креирање авторски филмски етиди, инспирирани од богатата ризница на македонската кинематографија. Мотото на проектот е „Гледај филмови, учи и создавај!“.