Централната прослава на Денот на германското обединување ќе се одржи во Бремен

Германија денеска го одбележува Денот на германското обединување со прослави и настани низ целата земја, додека централната државна церемонија се одржува во Бремен, каде што се очекува да се собере германската политичка елита.

Денот на германското единство го одбележува 3 октомври 1990 година, кога петте федерални покраини од поранешна Источна Германија се приклучија кон Сојузна Република Германија, со што формално заврши долгогодишната поделба на Источна и Западна Германија по Втората светска војна.

По службата во катедралата во Бремен, политичките лидери и други гости ќе се соберат во концертната сала „Ди Глоке“ за официјална церемонија, пренесува ДПА.

Се очекува повеќе од 400.000 луѓе да присуствуваат на јавната прослава во Бремен, која трае до недела. Бројни штандови и сцени се поставени во центарот на градот, а околу 800 настани се планирани како дел од прославата, вклучувајќи бесплатни концерти, дебати, водени тури и изложби. Прославите во Бремен се одржуваат под мотото „Многу сили – една земја“. Градот е домаќин на централната прослава бидејќи моментално претседава со Бундесратот, Горниот дом на германскиот Парламент.

Повеќе од три децении по падот на Берлинскиот ѕид, последиците од повторното обединување на Германија сè уште се предмет на жестока дебата. Разликите меѓу истокот и западот на земјата продолжуваат, особено во платите и богатството, додека економските превирања што следеа по повторното обединување сè уште го обликуваат истокот на Германија. Дел од населението на Источна Германија, исто така, верува дека има премалку влијание во државните институции.