Централната банка на Србија го врати целото монетарно злато од странство
Народната банка на Србија (НБС) брзо го врати златото што се чуваше во странство и со негово купување на домашниот и на странскиот пазар значително ги зголеми златните резерви, па со вредност од околу 2,3 милијарди евра, златните резерви на Србија пораснаа за 2,5 пати во споредба со 2012 година, објави НБС.
Слични трендови има и во Холандија, Австрија, Полска, Унгарија, Романија, а исклучителна побарувачка за овој благороден метал владее во Германија, Кина и Соединетите Американски Држави, каде златото се смета за еден од најбезбедните чувари на вредноста меѓу сите категории на инвестиции. Економските аналитичари велат дека тоа не треба да изненадува, бидејќи златото е клучен елемент за зајакнување на економската стабилност на земјата, но велат и дека е време српските граѓани да размислуваат за штедење и инвестирање во благородни метали, се наведува во соопштението. Се наведува дека бруто девизните резерви на НБС надминале рекордни 22,5 милијарди евра и дека златото како дел од структурата на овие резерви има посебно значење во време на глобални кризи, нестабилност и инфлација.
Во средината на годината, според податоците на НБС, резервите на злато тежеле 38,5 тони, што е два и пол пати повеќе отколку на крајот на 2012 година, кога оваа количина изнесувала 15,3 тони.
„Целото домашно злато се чува во нашите трезори и таква е ситуацијата од јули 2021 година кога беше донесен и последниот тон злато што се чуваше во странство. Во амбиент на зголемена глобална неизвесност, сите 13 тони злато беа вратени во Србија. На овој начин сакавме дополнително да ја зголемиме безбедноста и достапноста на нашето монетарно злато“, велат од НБС.
Според податоците на Светскиот совет за злато, САД имаат најголеми резерви на злато во светот со 8.133 тони, потоа Германија со 3.355 тони, а на трето и четврто место се Италија и Франција со нешто помалку од 2.500 тони. Русија е петта со 2.298 тони, а Кина е шеста со 2.010 тони, додека на Западен Балкан првото место го држи Србија со 38,5 тони. Следат Северна Македонија со 6,8 тони, Словенија со 3,7 тони, Албанија со нешто повеќе од три тони, Босна и Херцеговина со 2,7 и Хрватска со два тони злато.