Цените на нафтата се зголемија за повеќе од 25 отсто во третиот квартал

Цените на нафтата се зголемија минатата недела, зголемувајќи го порастот во третиот квартал на повеќе од 25 отсто, како резултат на намалувањето на производството од страна на Организацијата на земјите извознички на нафта (ОПЕК) и сојузниците на картелот.

На лондонскиот пазар цената на барелот минатата недела порасна за 2,2 отсто, на 95,30 долари, додека на американскиот пазар цената на барелот порасна за 1 отсто, на 90,97 долари. Така, во целиот трет квартал цената на барелот на лондонскиот пазар порасна за 27 отсто, а на американскиот за 29 отсто.

Побарувачката за нафта се очекува да се зголеми

Ова е резултат на неодамнешните одлуки на Саудиска Арабија и Русија за намалување на производството. Овие водечки светски извозници до крајот на оваа година ќе ги намалат испораките за вкупно 1,3 милиони барели дневно. И преостанатите членки на ОПЕК и сојузниците на картелот се согласија да го намалат производството.

Така, овие земји се обидуваат да ги задржат зголемените цени на нафтата, со оглед на тоа што побарувачката слабее поради забавувањето на растот на најголемите светски економии.

Бидејќи се очекува каматните стапки во САД и во еврозоната да останат покачени подолг временски период од претходно проценетите поради високата инфлација, се очекува растот на овие економии дополнително да забави, а со тоа и побарувачката за „црното злато“.

Од друга страна, трговците се надеваат на забрзување на растот на кинеската економија, најголемиот светски увозник на нафта.

Ова е една од најважните причини за минатонеделното поскапување. Имено, побарувачката за гориво во Кина се очекува да зајакне за време на седумдневниот одмор кој започна во петокот.

„(Зголемените) домашни и меѓународни патувања за време на празникот Златна недела ја зголемуваат кинеската побарувачка на нафта“, напишаа аналитичарите на АНЗ во белешката до клиентите.

По силниот раст во третиот квартал, економистите во анкетата на Ројтерс прогнозираат дека цената на барелот на лондонскиот пазар во четвртиот квартал во просек ќе изнесува 89,85 долари.

До крајот на годината на цените најмногу ќе влијае намалувањето на понудата од Саудиска Арабија и Русија, но растот на цените кон нивото од 100 долари за барел може да биде забавен од неповолните економски движења, сметаат повеќето аналитичари.

По минатонеделниот раст, цената на барелот на лондонскиот пазар е во плус во однос на почетокот на годината за околу 11 отсто, а на американскиот пазар за околу 13 отсто. (СЕЕбиз)