Целта е да се демонтира Украина – руски коментатор

Долгогодишен про-Кремљ коментатор вели дека целта на Русија во Украина е „постепено демонтирање и етапно реформатирање на оваа територија“.

Рускиот аналитичар, Пјотр Акопов, вели дека „сега сите разбираат дека воената операција ќе трае долго“.

Неговиот коментар, објавен од државната агенција на РИА Новости, е насловен „Русија ја менува тактиката, но не и стратегијата во Украина“.

Тоа го повторува говорот во петокот на високиот руски генерал Рустам Минекаев, кој предвидува руските сили да ја преземат контролата врз целото крајбрежје на Украина, од Донбас на исток до Молдавија на запад.

Русија има војници во Приднестровје, отцепена промосковска територија во Молдавија.

„Повлекување на нашите војници од која било од окупираните територии не доаѓа предвид“, вели Акопов.

„Ако ја земеме целта на втората фаза да воспоставиме контрола врз југот на Украина, тогаш треба да сфатиме дека и третата фаза е неизбежна – контрола над цела Новорусија“, вели Акопов.

Руските националисти ја гледаат „Новорусија“ како огромен дел од јужна Украина што некогаш ѝ припаѓал на империјална Русија. Претседателот Владимир Путин рече дека „Новорусија“ треба да го вклучи и регионот Харков на север.

Акопов вели дека Русија можеби нема да има потреба да ги заземе Киев и Лавов, бидејќи „по падот на југот, Украина како ентитет ќе почне да се распаѓа“.

Тој „колапс“, вели тој, ќе се случи „дури и без да се чека предавањето на Харков и контролата над цела Новорусија, бидејќи губењето на југот ја лишува Украина од шансите да постои како самоодржлива држава“.