Царовска: Се расфрламе со пари греејќи училници за еден наставник

Можно е наставниците да се вратат дома и да држат часови, за да не мора да се загрева цела училница за еден наставник, рече во Кочани министерката за образование и наука, Мила Царовска.

„Разговараме со градоначалниците за рационализација на средства, да не се расфрламе со пари за загревање на цела училница за еден наставник и тие пари да може да се искористат во набавка на ИТ-уреди. Кога ќе ја донесеме одлуката ќе ја информираме јавноста“, кажа министерката по посетата на ОУ „Љупчо Сантов“.

– Но, велам тоа го носиме заеднички со градоначалниците заради тоа што имаме наставници коишто одат со физичко присуство заради тоа што тоа Комисијата тоа го дозволила и ќе оставиме на ниво на колектив да одлучат на кој начин понатаму согласно грејната сезона ќе се одвива наставата во училиштето. Мислам дека тоа ќе биде најправедниот модел, но кога ќе го донесеме ќе биде известена јавноста, потенцира Царовска.

Таа исто така најави дека  оваа година нема да се организираат училишни екскурзии.

– Испратени се упатства од Бирото за развој на образование. Може до пет километри да имаат прошетка, движење учениците заедно со наставниците за да може да имаме социјализација. Но, од друга страна она што се случувало минатата година, зошто агенциите не ги вратиле парите сметам дека има уредби. Министерството за економија имаше препораки да се дадат ваучери коишто ќе може да се користат во наредниот период и тоа сигурно се случило, рече Царовска, одговарајќи на новинарско прашање во општина Кочани.

Министерката Царовска ги повика директорите на училиштата кои се одговорни за организација на екскурзиите, да ги викнат родителите и да најдат заеднички јазик на кој начин тие пари коишто биле од минатата година ќе им се вратат. Но, оваа година, како што потенцира, екскурзии не се дозволени.

Одговарајќи на новинарско училиште, Царовска рече дека во ова училиште и во сите училишта во државата каде што се обезбедени ИТ уреди и интернет се одвива онлајн настава. Посочи дека наставата се одвива преку двонасочна комуникација наставници – ученици.

– Во државата првпат сите ученици и сите наставници имаат спуштено лозинки и акаунти за користење на платформа за двонасочна комуникација. 88 проценти од наставата се одвива онлајн без никакви пречки, нагласи Царовска.

Прашана за барањето на родителите од Македонска Каменица за присуство на учениците во училиштата, Царовска рече дека бојкотот на наставата е само неконструктивен начин на искажување незадоволство од пандемијата.

– Пандемијата не е нешто која што ние денеска одлучуваме го сакаме или не го сакаме во нашата држава. Тоа не снајде и ние мораме да живееме со него. Во моментот кога бојкотираме настава само учениците губат од часовите, додека наша обврска како Влада, секако и обврска на општините, е да го штитат здравјето на граѓаните. Здравјето не е флоскула, здравјето на граѓаните се живот на нашите баби, дедовци, мајки, тактовци заради тоа што младите може да пренесат. И ако одлучила Комисијата за заразни болести дека навистина на овој начин е најдобро за заштита на здравјето јас ги повикувам сите ученици и сите наставници да се придружат на овој начин на изведување на настава согласно препораките на Комисијата за физичко присуство и Комисијата за заразни болести, рече Царовска.