Бугарските дипломати излегоа на протест, бараат поголеми плати

Едночасовен предупредувачки протест имаше во четврток на 30 ноември пред зградата на Министерството за надворешни работи на Бугарија. Од петок се очекуваат ефективни штрајкови доколку не се исполнат барањата за повисоки плати. Незадоволните вработени бараат и индексирање на патните средства, како и престанок на практиката на намалување на основната плата при одење на долгорочен службен пат, пишува бугарската редакција на „Еурактив“.

Демонстрантите во четвртокот фрлаа жолти стотинки во знак на протест поради ниските плати на одделот.

Проблемот беше поставен и пред пратениците на собраниската Комисија за надворешна политика. Шефот на Стручниот синдикат на државните службеници од Дипломатската служба, Мартин Колев, објасни, цитиран од БНР: „Ефективните штрајкови ќе вклучуваат суспензија на работниот процес како единствен можен правен притисок да се почитуваат нашите барања за штрајк. Штрајкот е во централната администрација на МНР и не ги засега странските претставништва и конзуларни служби. Во моментов имаме поддршка од над 50% од вработените“.

Од 25 до 30 милиони лева (до 15 милиони евра) ќе бидат потребни за исполнување на барањето за двојно зголемување на платите, што во моментов е тешко остварливо, стана јасно на дискусиите во Комисијата за надворешна политика на Националното собрание.

За дипломатски ранг потребни се минимум два странски јазици и магистерска диплома, напомена тој и додаде: „Имам три странски јазици и магистриратура, имам колеги во слична ситуација и мојата плата. е под 1.500 лева нето месечно“, посочи Колев.

Колев објасни дека досега се разговарало за зголемување до 30 отсто. Според него, тоа ќе ги врати нивоата на платите на Министерството за надворешни работи на оние на почетокот на годината поради инфлацијата.