Бугарскиот претседател стави вето врз измените на Изборниот законик

Бугарскиот претседател,  Румен Радев, стави вето врз измените на Изборниот законик, бидејќи, според него, тие даваат можност за фаворизирање на победата на владеачката партија на претстојните избори, јави БГНЕС.

-Сите измени во Изборниот законик имаат јасна цел да гарантираат официјална победа на владејачката партија на претстојните избори, нанесувајќи уште еден удар врз правната структура на нашата земја. Тие отстапуваат од јасните законски одредби и создаваат предуслови за сомнежи во правичноста на изборите и за нивно оспорување, рече попладнево претседателот Радев во обраќањето до нацијата.

Тој го критикуваше гласањето со гласачки ливчиња, паралелно со машинското, бидејќи законот експлицитно вели дека гласањето мора да биде машинско.

-Ова го прави машинското гласање бесмислено, категоричен беше шефот на бугарската држава.

Според него, овие одлуки тешко можат да се објаснат со нешто друго освен со желбата да се отворат доволно можности за хаос и изборна манипулација во корист на оние што се на власт.

-Отстранувањето на владата од одговорноста за одлуката за изнајмување или купување машини и нејзино пренесување во ЦИК значи практично бегство од одговорноста на парламентот, додаде Радев и потсети дека во Уставот јасно се наведени одредбите кои му наметнуваат одговорности на законодавецот во однос на изборите.

Бугарскиот претседател додаде дека се игнорираат голем број одредби за конкурентен почеток во економската активност и спречување на злоупотреба на монопол и нелојална конкуренција.

-Отсекогаш сум ја поддржувал јавната потреба за проширување на формите на директно учество на граѓаните во државната власт и локалната самоуправа. Но, ова мора да се направи под јасни правила и без спротивставување на Уставот, рече претседателот.

Укинувањето на законската забрана за решавање на прашања од надлежност на Врховното национално собрание преку национален референдум неоправдано меша две уставно утврдени форми на граѓанско учество во државната власт, критикуваше Радев. Ваквото проширување на директната демократија тој го нарече палијативно бидејќи повеќе не им даваше можност на граѓаните да решаваат важни прашања.

Трите месеци протести на кои се бараше оставка се доказ за длабоката криза во демократијата. Анкетите ја регистрираат урнисанатата доверба на јавноста во владата. Изборите се основа на секоја демократија и како ќе се движиме напред зависи од нивната искреност и транспарентност, коментира Радев.

Одбивањето на владата да го слушне гласот на народот ја продолжува агонијата, предупреди шефот на државата. На крајот, тој рече дека во оваа ситуација, кабинетот не владее, но се обидува да избегне политичка и правна одговорност за бројните скандали што ги одбележаа последните години.