Бугарија купува уште осум авиони Ф-16 и ќе ги модернизира С-300

Во следните неколку години Бугарија ќе купи уште осум американски авиони ловци Ф-16, изјави командантот на бугарското Воено воздухопловство, Цанко Стојков.

Тој додаде дека новите авиони треба да бидат испорачани пред да се повлечат од употреба авионите МиГ-29.

– Осумте авиони би требало да ги заменат МиГ-29, што ќе бидат повлечени поради застареност. Со оглед на тоа што нивниот рок истекува во следните три години, во периодот од 2023 до 2025 година би требало да се потпише договор за испорака, наведе Стојков.

Тој додаде дека во рамките на модернизација на Военото воздухопловство во периодот пд 2025 до 2030 година се очекува да се набават и противвоздушни ракетни комплекси со краток и среден дострел, додека за 2021 година планирана е модернизација на С-300. Исто така се планира и купување на 3Д радари.

Претходно, Стејт департментот одобри да и се продадат на Бугарија осум авиони ловец Ф-16 и дополнителна опрема на Бугарија во вредност од 1,67 милијарди долари.