Бучковски: Во владејачката коалиција има партија за заедничка историја со Бугарија и друга против неа

Ако цениме по средбата од вчера што ја имал претседателот Радев со претставниците на безбедносните служби, реферирајќи на тоа дека во Македонија оние кои се декларираат како Бугари имале проблеми со власта и биле изложени со притисоци, при што се користени писма од невладина организација, говори дека постои веројатно можност прашањето околу односите Македонија и Бугарија да бидат дел од изборната кампања. Но, не верувам дека интензитетот ќе биде таков што тоа ќе биде преовладувачка тема. Во оваа фаза во која се наоѓаме Македонија е главниот адут кој го користи и власта и опозицијата, убедувајќи нѐ нас дека независно од резултатите на парламентарните избори на 4 април ќе биде константна политика на која било бугарска влада, изјави во „Утрински брифинг“ на Слободна ТВ Владо Бучковски, специјален претставник на Владата за Бугарија.

„Ние се обидуваме во дневната комуникација што ја имаме со претставниците на бугарското МНР и на дневна основа да демантираме дел од тврдењата кои стигнуваат до бугарското МНР за евентуалните проблеми кои ги имаат Бугарите во Македонија и сето тоа остава впечаток дека континуирано има проблеми. Има една тенденција постојано дел од нашите сограѓани кои се декларираат како Бугари да изразуваат незадоволство од третманиот кој го имаат. Посебно во овие неколку месеци по блокадата на нашите ЕУ интеграции. Но, мислам дека сфаќаат дека ова не е преовладувачката атмосфера кај нас. Проблемите се дефинитивно во изгубената доверба. Ние сме искрени во намерите да го испочитуваме договореното од 1 август 2017. Се обидуваме со неколку потези да ја вратиме довербата. Сега сме во фаза, мерките на градење доверба да ги спроведеме на дело. Вчера беше потпишан договорот помеѓу Македонскиот телеком и Бугарската национална телевизија. Се надевам дека утре ќе биде присутна бугарската национална телевизија и ќе биде добро и пошироката македонска јавност да се запознае со политиките на главните политички фигури во Бугарија“, вели Бучковски.

Тој потсети на ставот на премиерот дека планот на Љупчо Георгиевски не е дел од македонската стратегија.

„Потврда стигна и од бугарска страна. Ние успеавме да ја задржиме климата да имаме постојана и редовна комуникација. За акцискиот план сме со 99% усогласени. Ако Комисијата ги усогласи записниците од 11. средба и годишниот извештај тоа ќе ни даде можност да имаме меѓувладина конференција. Таа е битна за потврда на она што ние го правиме. На 10 март во Софија се потпишува договор помеѓу МРТ и БНТ за соработка која мислам дека ќе биде сериозен исчекор напред. На 17 доаѓа директорот на бугарската телеграфска агенција, така што во делот на медиумите ова ќе биде сериозен исчекор во еден дел каде говориме дека медиумите се клучна алатка во создавање атмосфера на пријателство“, вели Бучковски.

„Ова не се нови ставови на Љупчо Георгиевски. Тие заслужуваат внимание и аргументирана расправа. Нам ни треба подготовка на домашната јавност за темите кои ќе се наметнат во периодот кој претстои, а тоа се темите за заедничката историја. Ние и во владината коалиција имаме коалициски партнер кој ја форсира темата за заедничката историја, имаме коалициски партнер, Павле Трајанов, кој вели дека немаме заедничка историја, така што умешноста на премиерот, на Владата е во овие околности, кога во јавноста имаме атмосфера на говор на омраза, омаловажување на Георгиевски без сериозни аргументи, да имаме сериозна дебата, иако мислам дека во овој момент таа дебата треба да се води со изложување на аргументи. Моето искуство во изминативе три месеци покажува дека имаме кристално јасна позиција на македонскиот јазик и идентитет, т.е. на реалноста. Признавањето на реалноста дека постојат различни народи кои говорат различни јазици. Од друга страна е инситирањето од бугарска страна дека треба да се соочиме со заедничката историја, а не само да повторуваме дека имаме заедничка историја. Што е тоа од заедничката историја согласно договорот, кои се тие настани и личности кои потврдуваат дека во минатото потврдуваат дека сме имале такви заеднички моменти кои треба да бидат во нашата заедничка иднина. Еден е ставот на Герогиевски, друг е да речеме ставот на МПЦ, која во ноември 2017 повикувајќи се на заедничаката црковна историја побара БПЦ да биде црквата мајка“, нагласи Бучковски.