БРТ откочен – ќе се развива велосипедската инфраструктура

Градоначалникот на Скопје, Орце Ѓорѓиевски, на денешната прес-конференција изјави дека општините во земјава во изминатиот период добиваат силна поддршка од Владата и од Светската банка за реализација на капитални и инфраструктурни проекти, а меѓу најзначајните инвестиции ја посочи набавката на нова механизација за комунална хигиена.

Градоначалникот истакна дека една од клучните теми на кои се работи е урбаната мобилност и одржливиот транспорт, не само во главниот град, туку и во останатите општини во Македонија. Во таа насока, тој се осврна и на проектот за брз автобуски превоз (БРТ), при што посочи дека процесот е повторно активиран и дека е обезбедена поддршка од Владата за негово понатамошно реализирање.

„Конечно го откочивме целиот процес и се подготвуваме за започнување на прелиминарната фаза. Овој проект ќе има значително влијание врз мобилноста во Скопје“, рече Ѓорѓиевски.

Исто така, покрај подобрувањето на протокот на сообраќајот, најави дека во наредните три до четири години ќе се инвестира и во развој на велосипедската инфраструктура, пешачките патеки и други решенија што ќе им понудат на граѓаните алтернативни начини на движење.