Бројот на Скопјани кои користат велосипед се зголемил во корона кризата


Фото: Б. Грданоски

Локалните и државни власти итно да преземат похрабри мерки во делот на јавниот превоз и да овозможат подобри услови за користење на алтернативните средства за превоз бидејќи граѓаните се свесни за значењето на велосипедот.

Ова е заклучокот од онлајн анкетата што граѓанските организации „НаТочак“ и „Одржливи иницијативи“ ја спроведоа во ноември врз 1615 учесници во градскиот сообраќај во врска со нивното движење низ Скопје пред и за време на короната и нивното мислење за велосипедот.

Анкетата покажа дека 28 проценти од испитаниците направиле промена во начинот на превоз поради вирусот. 

Бројот на индивидуални корисници на автомобилот пораснал за 21,56 проценти за време на кризата, а бројот на корисници на јавниот превоз се намалил за 55,43 проценти.

Околу 90 проценти од оние кои го замениле споделениот автомобилски или јавен превоз со сопствен автомобил, тоа го направиле поради страв да не се заразат со вирусот.

– Соодветна инфраструктурна промена би ги спречила негативните тенденции од корона-кризата (зголемен број корисници на индивидуален автомобил) да продолжат и ескалираат после кризата (со зголемен автомобилски сообраќај од новите корисници), а би ги поддржала позитивните тенденции (порастот на одржливиот активен сообраќај на кој сме сведоци и покрај севкупно намаленото движење), велат од иницијативата „НаТочак“.

За време на кризата се зголемил бројот на луѓето кои пешачат за 22,47 проценти, а на луѓето кои возат велосипед како превоз за 20,88 проценти. Резултатите од анкетата покажуваат и дека 60 проценти од оние испитаници кои почнале да користат велосипед за време на кризата, живеат во општини кои даваат бенефиции за користење на велосипед како што се Карпош и Аеродром.  

Анкетата покажа и дека голем број од анкетираните или поточно 80 проценти имаат велосипед. И луѓето кои возат повремено велосипед и луѓето кои вооопшто не користат велосипед, со 97 и со 90 проценти сметаат дека велосипедот треба да заземе поактивно учество во градскиот сообраќај и да се создадат услови за тоа. Три четвртини од оние кои воопшто не користат велосипед одговориле дека би сакале да возат и би возеле кога би имало подобра инфраструктура, безбеден сообраќај и безбеден паркинг.  

– Корона-кризата е одлична можност да се воведат нови велосипедски ленти, да се ослободат тротоарите и да се донесат политики за јавниот простор кои ќе овозможат зголемено учество на велосипедот, за сите учесници во сообраќајот, без разлика на нивниот префериран начин на движење. На пример, дури 72 проценти од оние на кои примарно превозно средство им е автомобилот се согласни за поинакви политики за јавниот простор. Велосипедот е најсоодветна анти-корона мерка во сообраќајот за 70 проценти од сите испитаници, но и за 63 проценти од оние кои користат автомобил и за 61 процент од оние кои користат автобус, а истовремено и лесно остварлива, или поинаку кажано, зголемената употреба на велосипеди е втора најостварлива анти-корона мерка после зголемениот број автобуски линии, велат од „НаТочак“.

Анкетата била поддржана од страна на проектот „Да зборуваме за климатските промени“, спроведуван од Еко Свест, ЦНВП Македонија и ДЕМ, а финансиски поддржан од Европската Унија.