Босанци ја презедоа пиварницата „Лашко унион“, отпуштени 50 работници

Кон крајот на ноември завршува лиценцираното производство на безалкохолни пијалоци од брендовите „сола“ и „зала“ на пиварницата „Лашко унион“ во Љубљана.

Како резултат на тоа, 50 работници беа отпуштени, а околу 170 останаа вработени на локацијата во Љубљана од 410.

Словенечкиот министер за економија Матјаж Хан го изрази своето разочарување од ваквиот развој на настаните.

Во јануари, пиварницата „Лашко унион“ ги продаде брендовите на пијалоци „сола“ и „зала“ на словенечката компанија „Ника бев“, која е поддржана од компанијата „Станиќ пијалоци“, во сопственост на семејството Станиќ од Крешево (БиХ).

Во согласност со договорот, на крајот на овој месец ќе заврши лиценцираното производство на споменатите безалкохолни пијалоци на љубљанската локација на пиварницата, потсетија во понеделникот од пиварницата која ќе продолжи да се грижи за нивната дистрибуција во Словенија.

Одлуката за продажба ги погоди и вработените во синџирот на снабдување кои се поврзани со брендовите „сола“ и „зала“. Како што нагласуваат од пиварницата, поврзаните проблеми биле решени „внимателно и во согласност со словенечкото законодавство“.

Воедно појаснија дека поради прекин на производството биле отпуштени 50 вработени, а по завршувањето на производството на безалкохолни пијалоци на љубљанската локација на пиварницата „Лашко“, останале вработени околу 170 работници.

Како што наведуваат, на вработените им биле понудени други работни места во компанијата согласно нивните вештини и компетенции. Доколку не ја прифатиле таа опција добивале отпремнина согласно колективниот договор.

„Сите отпремнини се исплатени целосно во согласност со важечката работна регулатива и даночната легислатива, како и трговскиот колективен договор кој важи за синдикатот на пиварницата „Лашко““, посочија оттаму и додаваат дека трговскиот колективен договор од областа на отпремнините е поповолен за вработените отколку работниот однос“, велат оттаму, пишува SEEbiz.

Отпуштените работници во петокот, како што пишуваат повеќе медиуми, изјавиле дека се чувствуваат измамени затоа што отпремнините им биле префрлени на плата, што значи дека морале да плаќаат данок, додека отпремнините до десет плати се ослободени од данок.

„Градот Љубљана отсекогаш бил и ќе биде лулка и дом на брендот „Унион“, затоа пиварницата ќе продолжи да биде присутна на оваа локација“, посочуваат од пиварницата.

Како што наведоа, подготвиле тригодишна инвестициска програма во вкупен износ од над 30 милиони евра, каде меѓу другото е планирано инвестирање во веледрогеријата „Давид темпл“ и натамошни инвестиции во пиварницата „Лашко“, која ќе стане една од најголемите пиварници на „Хајнекен“ во регионот“. Седиштето на пиварницата останува во Љубљана.

За настаните говореше и министерот за економија Матјаж Хан, кој пред новинарите изјави дека системот на работа на големите корпорации е тој што ја намалува цената на трудот.

„Сепак, тажен сум што компаниите како „Унион“ и „Лашки“ станаа погони за полнење. Како социјалдемократ, не ми е сеедно што луѓето губат работа во такви компании кои имаат многу добри резултати“, рече тој.