Битолчани против депонија во Пелагонија, бараат формирање на координативно тело и организиран настап

БИТОЛА – Формирање на координативно тело на протестите и организиран настап пред институции, побараа граѓани на Битола на вечерашниот протест против депонија во Пелагонија, што се одржа пред Општина Битола.

Трета среда по ред, граѓани излегоа на мирен протест против изградба на регионална депонија на територијата на Општина Новаци. На протестот што започна пред зградата на Општина Битола, насобраните граѓани се изјаснија против изградба на регионална депонија, во близина на Битола. Бараат надлежните да најдат друга локација за реализација на проектот.

За граѓаните кои протестираат е спорно и тоа што според проектот, на депонијата кај Новаци смет ќе одлагаат 18 општини од Југозападниот регион.

„Мора да се организираме со координативно тело и да настапиме организирано, не вака. Мора да има барања поврзани со нашиот проблем, а не вака само со блокада на улицата и пред зградата на општината каде внатре нема никој. Мора да се има контитуитет. На депонија ќе се носат 300 до 320 илјади тони отпад“, рече Тони Апостоловски, говорник.

На ова имаше негодување од присутните. Зоран Лазаровски-Паљо кажа дека е зачуден од излезноста на битолчани на протестот и дека ги има во се помал број, наместо масивност.

Битолчани мирно маршираа од пред Општина Битола, преку Широк Сокак до Офицерскиот дом.

Градоначалникот на Општина Новаци, Стевче Стевановски, на чија територија ќе се гради новиот регионален центар за преработка на отпад вели дека за брзо време власта ќе тргне во објаснување на целиот проект на граѓаните и бенефитот од новиот регионален центар.

Советниците од Советот на Општина Битола со допис до Владата побараа нова локација за депонијата.

„Практично имаме ѓубришта, а немаме центри за управување со отпад. Во Новаци и во моментов имаме голем проблем со отпадот, затоа што неколку општини од регионот го депонираат сметот на ѓубриштето во Мегленци која е крајно нестандардизирана, нерегулирана депонија и не знаеме ни што се одлага, ни што се носи таму. Ќе тргнеме во офанзива со луѓе кои се стручни во оваа област, како од државата, така и од странство, професори, експерти од областа кои што на директен начин на граѓаните ќе им го доловат ова решение кое што ќе значи бенефит за целиот регион“, рече Ставановски на конференцијата „Преобмислување на отпадот – од предизвици до одржливи решенија“ , што вчера се одржа во Скопје.

Од Министерството за животна средина тврдат дека ја разбираат скепсата, и најавија дека веќе овој месец екипи на МЖСПП, составени од стручни лица ќе одат на терен, меѓу населението на Пелагонискиот и Југозападен регион, за да ја објаснат потребата од изградба на регионална депонија.

„Досега не е воспоставен целосен регионален систем за управување со отпад (во сите региони е во почетна фаза, т.е. нема сеуште регионална депонија која е оперативна). Доколку не се воспостави, нема да може да се покажат и бенефициите за граѓаните од ваквиот пристап. МЖСПП, иако има веќе одржано неколку јавни расправи, има план за одржување на поинтензивни јавни расправи за граѓаните, со сите инволвирани стручни лица на проектот со цел да ја објасни состојбата и да помогне во намалување на недовербата кај граѓаните. Истите се планира да се одржуваат во тек на месец април 2025 година“, се вели во дописот од Министерството.  (А.Б.)