Битка за спас на воздушниот сообраќај: Авиокомпаниите до сега добиле 123 милијарди долари државна помош


Владите ширум светот досега издвоија 123 милијарди американски долари за да им помогнат на авиокомпаниите погодени од пандемијата на коронавирус, соопшти Меѓународно здружение за воздушен превоз (ИАТА).

Притоа, 45 проценти од таа сума се состои од субвенции за исплата на плати, инвестиции во основен капитал и даночни олеснувања, а останатите 55 проценти се државни заеми што компаниите ќе треба да ги вратат, соопшти ИАТА на денешниот брифинг во Женева.

Владите мора да бидат свесни дека зголемениот долг ќе има свои последици, рече директорот на ИАТА, Александар де Жуњак.

– Тоа значи дека закрепнувањето ќе биде многу подолго и потешко, објасни тој.

ИАТА проценува дека вкупниот долг на авиокомпаниите ќе достигне 550 милијарди американски долари до крајот на годината. На крајот на 2019 година, тој изнесуваше 430 милијарди долари.