Битиќи – Ангелов: Бугарија е петти трговски партнер на Македонија, соработката треба да се унапреди

Еден од приоритетите на Владата е да се подобри економската соработка со земјите од регионот, истакна вицепремиерот Фатмир Битиќи на средба со амбасадорот на Бугарија во нашата земја, Ангел Ангелов. Битиќи посочи дека Бугарија традиционално е помеѓу најдобрите трговски партнери на нашата земја, оваа година позиционирана на петтото место, согласно обемот на трговска размена.

„Интензивирањето на соработката мора да продолжи и понатаму, во интерес на двете земји и особено на граѓаните кои живеат во нив“, рече Битиќи.

На средбата стана збор за досегашната економска соработка помеѓу двете земји, како и за идната соработка, за која се согласија дека има голем потенцијал да расте.

Амбасадорот Ангелов упати честитики кон вицепремиерот Битиќи за новопреземената должност и изрази очекување дека Република Северна Македонија ќе продолжи со успех по евро-интеграцискиот пат, како и дека соработката помеѓу двете земји ќе продолжи да се развива во позитивна насока.

Во соопштението од средбата се вели дека Битиќи и Ангелов се согласија дека со Договорот за пријателство, добрососедство и соработка се поставени одлични темели за понатамошната економска соработка помеѓу двете земји.

Битиќи потенцираше дека Владата ќе направи максимални напори за забрзување на реализацијата на проектот за изградба на делот од пан-европскиот железничкиот коридор 8, односно пругата Куманово – Деве Баир, како и на експресниот пат Ранковце – Деве Баир, со што значително ќе се подобри поврзаноста на двете земји, а со тоа ќе се подигне квалитетот и безбедноста за транспорт на луѓе и производи.

Новата развојна економија, како еден од главните столбови на програмата на Владата, предвидува иновативна и дигитализирана економија и поддршка на старт ап заедницата. Вицепремиерот Битиќи заедно со амбасадорот Ангелов разговараа за можноста за размена на искуства од страна на Бугарија за време на пристапните преговори со Европската Унија за развој и поддршка на старт ап заедницата во Северна Македонија.

Соработката и комуникацијата помеѓу двете земји останува отворена, бидејќи како што и вицепремиерот Битиќи и амбасадорот Ангелов се согласија, тие носат подобар живот за граѓаните на двете држави, се вели во соопштението од Кабинетот на вицепремиерот Битиќи.