Би-би-си отпушта 2.000 работници

Британската медиумска компанија Би-би-си објави дека во следните две години ќе намали помеѓу 1.800 и 2.000 работни места, што значи дека секое десетто лице ќе ја изгуби својата работа.

Тие како причина ги наведоа „значајните финансиски притисоци“, објави SEEbiz.

Привремениот генерален директор на Би-би-си, Родри Талфан Дејвис, рече дека Би-би-си мора да заштеди 500 милиони фунти (575 милиони евра) во следните две години, според веб-страницата на Би-би-си.

Дејвис не ја исклучи можноста за прекин на цели програми или услуги.

„Со оглед на количината на заштеди што треба да ги направиме, несомнено ќе се соочиме со големи и тешки одлуки, но мора да дејствуваме разумно“, рече тој.

Деталите за промените што ќе ги почувствуваат нивните телевизиски, радио и онлајн корисници ќе бидат презентирани подоцна.

„Мораме да откриеме како да ги спроведеме промените во следните три до четири месеци без да влијаеме на нашите основни услуги“, рече тој, додавајќи дека е свесен дека намалувањето на работните места во персоналот ќе биде „многу тешка работа“.

Би-би-си во моментот има околу 21.500 вработени со полно работно време, а намалувањето на работните места ќе биде најголемо во последните 15 години. Најавените намалувања веќе беа критикувани од синдикатите на новинарите, велејќи дека ќе бидат катастрофални за вработените.

Овој медиум преживува во голема мера благодарение на јавните финансии, но приходите се намалија за 24% од 2017 година.