Бесна тирада на Трамп по пресудата, Бајден возврати

Џо Бајден во петокот предупреди дека е непромислено и „опасно“ за некој да тврди дека кривичната пресуда на Доналд Трамп е резултат на монтиран судски процес, откако поранешниот претседател ја критикуваше пресудата против него, а републиканците го навредуваа интегритетот на американскиот правосуден систем.

Доналд Трамп во петокот наутро бесно го нападна новиот статус на „престапник“ што му го додели поротата во Њујорк, чија пресуда за вина го направи првиот поранешен претседател на САД кој некогаш станал осуден криминалец.

Во петокот попладне, Бајден го започна разговорот во Белата куќа за војната во Газа со забелешки за критиките од Трамп и десницата за историското судење што заврши во Њујорк еден ден претходно.

Американскиот претседател рече: „Несовесно е, опасно е, неодговорно е некој да каже дека ова е наместено, само затоа што не му се допаѓа пресудата. Американскиот правосуден систем опстојува речиси 250 години и е буквално камен-темелник на Америка“.

Тој додаде дека треба да се почитува системот и правдата што ја произведе.

„И никогаш не треба да дозволиме некој да го урне, вака едноставно, тоа е Америка“, рече Бајден.

Говорејќи во Трамп тауер на Менхетен придружуван со овации од неговите поддржувачи, Трамп веднаш го постави тонот со тоа што се прогласи за невин и повторно разгледувајќи ги популистичките предупредувања за изборната кампања.

Тој рече: „Ако можат да ми го направат ова мене, можат да му го направат тоа на секого“.

Настанот беше најавен како прес-конференција, но Трамп не одговораше на прашања.

Наместо тоа, тој западна во монолог од 30 чудни минути кој се вртеше на познати, запаливи теми. Тој го критикуваше судењето и го надополни говорот со невистини и теории на заговор дека може да дојде до лоши работи доколку не биде вратен во Белата куќа овој ноември, вклучително и антиимигрантска реторика.

Во меѓувреме, неговиот правен тим веќе тргна во контраофанзива на кривичната пресуда, со цел да ја поништи пресудата од четвртокот.

Со кампањата за претседателските избори во 2024 година, која се проби длабоко на непозната територија, Тод Бланш, адвокатот на Трамп, излезе на националната телевизија за да даде храбра, но одмерена одбрана на својот клиент, ветувајќи дека ќе поднесе жалба.

Поротата заклучи дека Трамп ги фалсификувал документите поврзани со тајните пари платени на Сторми Даниелс, непосредно пред претседателските избори во 2016 година, за да ја замолчи нејзината приказна дека спиела со него порано за време на неговиот брак со Меланија Трамп.

Појавувајќи се на Ен-Би-Си, Бланш инсистираше на тоа дека одбраната на Трамп не добила фер третман за време на судењето.

„Ќе се жалиме и ќе победиме по жалба“, изјави Бланш. „Тоа е целта. Целта е … брзо да се поднесе жалба и се надеваме дека брзо ќе биде усвоена“.

Трамп сега се соочува со изгледите дополнително да влезе во книгите, доколку биде испратен во затвор кога судијата Хуан Мерчан ќе го осуди на 11 јули, четири дена пред републиканската национална конвенција во Милвоки, каде што треба официјално да биде именуван за претседателски кандидат на партијата за изборите во ноември годинава.

Некои аналитичари предвидуваат дека изгледите за затворска казна се зголемија поради постојаното прекршување на наредбите за Трамп за време на шестнеделното судење и неговата осуда на Мерчан како „корумпиран и конфликтен“ по пресудата во четвртокот.

Но, Бланш ја омаловажи таа можност, укажувајќи на напредната возраст на Трамп и неговиот претходен недостаток на криминално досие.

Обласниот обвинител на Менхетен, Алвин Брег, кој го водеше случајот против Трамп, а исто така беше нападнат од поранешниот претседател, допрва треба да објави дали ќе побара затворска казна.

Трамп остро го поврза своето гонење и пресудата со Бајден, кого го нарече „манџуриски кандидат“ и „најлошиот претседател во нашата историја“, како и „глупав“ и „нечесен“.

„Тие се во целосна врска со Белата куќа, Министерството за правда, само да разберете, сето тоа го прават Бајден и неговите луѓе“, рече тој, мислејќи на правниот тим што го предводеше обвинителството и веројатно Мерчан, кого тој го нарече – меѓу другото – „тиранин“.

Трамп и неговата кампања рекоа дека од пресудата собрале повеќе од 30 милиони долари.

Лари Сабато, директор на Центарот за политика на Универзитетот во Вирџинија, рече дека лажните обвиненија на Трамп дека случајот е организиран од Бајден го зголемија сеништето за дополнително политичко насилство во време кога се чекаат одлуките на Врховниот суд за нападот на 6 јануари 2021 година на американскиот Капитол.

„Вистинската загриженост овде не е дека Трамп ќе може да ја раздвижи својата база и да добие многу повеќе гласови, бидејќи нема нема од каде уште многу гласови да се добијат“, рече тој. „Вистинското прашање е дали Трамп ќе продолжи да го храни ова чувство на прогон, со лажни обвиненија дека Бајден го оркестрира сето ова.

Тоа не е начинот на кој функционира нашиот систем. Но, тој ја уништи довербата на јавноста во нашиот изборен систем, а сега ја уништува довербата на јавноста во нашиот судски систем. Човекот е најлошото нешто што ѝ се случило на американската демократија во мојот живот“. (Гардијан)