Белорусите не се плашат – денеска пак излегоа 100 илјади луѓе на протести

Апсењата и тепањата не ги заплашија Белорусите. Улиците во Минск денеска беа преполни со луѓе (Фото: Ројтерс)

Александар Лукашенко го зголеми притисокот врз демонстрантите и полицијата притвори стортици лица за да му покаже на Путин пред нивната средба в понеделник дека ја контролира ситуацијата. Настаните во белоруските градови покажаа поинаква слика

 

Најмалку сто илјади Белоруси ги преполнија улиците во Минск и другите градови во уште еден голем притисок до претседателот Александар Лукашенко да се распишат нови избори. Протестот на 13 септември беше знак дека опозициските активисти, и многу обични Белоруси, не се обесхрабрени од илјадници апсења, тепања и други тактики за заплашување што ги користат белоруските безбедносни сили.

Со скандирања „Да живее Белорусија!“ и „Саша, ти си отпуштен!“ толпи луѓе го наполнија еден од главните булевари во Минск, веејќи го црвено-белото знаме на опозицијата и носејќи знаци што ги исмеваа Лукашенко и владините претставници.

Лукашенко, кој владее со земјата 26 години, одби да разговара со своите противници и ги отфрли повиците за одржување нови избори. Обединетите нации проценија дека до 6.000 лица биле ставени во притвор, а во некои случаи и на тортура од белоруски агенти за безбедност.

Камиони и оклопни возила кои припаѓаа на агенциите за спроведување на законот можеа да се видат паркирани покрај некои централни улици, а безбедносните сили со шлемови приведуваа некои учесници во маршот во Минск.

Пред демонстрациите, Министерството за внатрешни работи соопшти дека го зголемило бројот на полицијата и војската „за да спречи незаконско дејствување со протестирање на граѓани“. Министерството исто така рече дека „околу 250 лица“ биле приведени за прекршоци како прикажување на забранетото црвено-бело знаме и транспаренти, „вклучувајќи и навредливи“.

 

Некои активисти пријавија прекини на интернетот во Минск, можно повторување на она што се случи неколку часа по изборите на 9 август на кои Лукашенко беше прогласен за победник. Активистите рекоа дека тогаш тоа било тактика насочена кон запирање на независното известување.

Големи протести се одржаа и во југоисточниот град Хомел и во западниот пограничен град Брест, каде активисти, наводно, носеа транспарент на кој пишуваше „Здраво на Хабаровск од Брест“ – упатување на неколкунеделните антивладини протести што се случија во рускиот далечен источен град Хабаровск. Во Брест, полицијата користеше водени топови врз демонстрантите, според каналот „Нехта во живо“.

Еден ден претходно, стотици жени маршираа низ Минск, соочувајќи се со маскирани полицајци за безбедност и агенти. Министерството за внатрешни работи соопшти дека 114 лица биле приведени низ целата земја, од кои 99 во главниот град, во врска со овие демонстрации.

Во меѓувреме, одделот за печат на Министерството за внатрешни работи ги опиша жените демонстранти како „агресивни“.

„Срамота е да се гледа: вреска, вреска…“, рече Министерството. „Таквото однесување е неженствено.

Демонстрантка со историското бело-црвено знаме на Белорусија пред специјалните единици (Фото: Ројтерс)

Многу од најистакнатите опозициски лидери во Белорусија се жени, вклучувајќи ја и кандидатката за претседател во егзил Светлана Тихановска и притворените членови на Координативниот совет како Марија Колесникова и Лилија Власова.

Тихановска, која побегна во Литванија по изборите, поради извештаите дека е можно да биде уапсена, апелираше демонстрантите да „останат мирни“ и побара меѓународна поддршка за поттикнување мирно решавање на „длабоката политичка криза“.

На белорускиот државен универзитет во Минск, наставниците од одделот за јазици издадоа видео апел за слобода на говорот. Повеќе од десетина ученици беа приведени минатата недела на протестот во близина на одделот за јазици во училиштето.

„Стравот е лош, насилството е лошо, лагите се лоши. Не можете да се преправате дека ништо не се случува“, се вели во апелот, во кој беа вклучени девет говорници.

Лукашенко подолго време има значителна поддршка, особено од постарото население во земјата, од кои многумина се носталгични за советскиот период. Но, пукнатини се отворија и кај сегменти од населението, како работниците, каде Лукашенко традиционално бараше гласна јавна поддршка во минатото.

Штрајкувачкиот комитет на еден од најголемите светски преработувачи и извозници на ѓубрива, „Белорускали“, соопшти преку Телеграм на 13 септември дека еден од неговите членови е приведен и се наоѓа во локалната полициска станица.

Во меѓувреме, Лукашенко требаше да отпатува во Русија за да се сретне со претседателот Владимир Путин на 14 септември. Иако тие двајцата зборуваа пет пати по телефон досега средбата во Сочи треба да биде прва лице в лице откако Лукашенко јавно побара помош од Москва да ги скрши демонстрациите.

Портпаролот на Кремљ, Дмитриј Песков, рече дека нивните разговори ќе се фокусираат на енергетската соработка и билатералните врски.

Опозициските веб-страници и поддржувачите на социјалните медиуми го усвоија слоганот „Нема да дозволиме да ја продава земјата“ пред состанокот во Сочи.

Руското Министерство за одбрана на 13 септември соопшти дека нејзините трупи ќе учествуваат заедно со белоруските војници во годишната тактичка вежба „Словенско братство“ на полигон за обука во западна Белорусија. Руска дивизија за падобранци ќе учествува во вежбите што започнуваат на 14 септември, се вели во него.

Алеш Бјалјатски, директорот на Центарот за човекови права „Вјасна“, предупреди дека Лукашенко ќе се обиде да ги интензивира притворите и заканите пред состанокот на Путин „за да му покаже на Кремљ дека протестите стивнуваат и дека тој ја контролира ситуацијата“.

„Но, досега репресијата имаше спротивен ефект“, рече тој. (Според агенциите)